Йәй ауышты көҙгә ҡарай Айһылыу ҒАРИФУЛЛИНА

КӨҘГӘ АУЫШЫУ
Ҡыҙҙырмай. Өтмәй. Самаса –
Тандыры менән бары.
Йәй ауышты көҙгә ҡарай -
Ғүмер шылышты ары.
Иртә-кисен һалҡынайта –
Дерҙәмәй томорҡаһы.
Күк-кәсәлә бер ҡабымлыҡ
Ҡояшы- йомортҡаһы.
Билбыуарҙан үлән ауғас,
Тырпайған сүкерҙәре.
Ҡурпы сыҡҡас ут йәшелдән
Йәмләнеп китер әле.
Ә әлегә ҡыҙыу осор –
Тандырлыҡ ҡояшта тик.
Бер көнө йылды туйҙырыр
Бәрәктле мәлдәр бит.
Көҙгә тарттыҡ. Йәй йәмдәре
Ҡалыр тик иҫтә генә.
Ашығып йәй эш теүәлләй -
Ут ҡапҡан итәгенә...

МИҢЛЕ БӘХЕТ

Миңле бәхет, минле бәхет
Миңә генә тәғәйен.
Хәләл булһын кейгәндәрем,
Ҡапҡан һәр бер тәғәмем.
Миңле бәхет тик минеке –
Йәшәй-йәшәй төшөндөм.
Тормош һынауҙары ҡаты –
Йә яндым, йә өшөнөм.
Миңле бәхет түгел тәхет,
Миңле бәхет – яҙмыштан.
Башҡаларға һис үпкәм юҡ,
Ғәйеп миндә – яң(ы)лышһам.
Миңле бәхет сәйлән төҫлө
Өҙөлә лә ялғана.
Мин риза ошо өлөшкә –
Рәхмәтлемен Аллама!

АҘАН
Ишетелә Ерҙә, Айҙа –
Бәрәкәттер бер Хоҙайҙан.
Унан матур бармы ауаз –
Ҡыйып әйтер ниндәй ауыҙ?
Шайтандарҙан беҙгә ҡалҡан –
Йыйнаусы мосолман халҡын.
Тетрәндерер, илһам бирер,
Йөрәгеңә үтеп керер,
Намаҙға баҫ, тиеп өндәр,
Ҡеүәт бирер көнгә, төнгә.
Эй, илаһи ошо аҙан –
Яҙҙырмаһын унан Аллам!

ҠАЯЛАР

Быуаттарҙы яҫтап тауҙар тора,
Дәүерҙәрҙе терәп – ҡаялар.
Иҙел буйы ише хозур ерҙәр
Әйтегеҙсе, тағы ҡайҙа бар?
Йышып ҡаҙағандай – ҡаяу ише,
Үҙ еренә ҡалҡан-таяу ише –
Ҡаяларҙа бөтмәҫ тынлыҡ бар,
Ҡаяларҙа рухҡа ымлыҡ бар!
Нәҡ Бөрйәндең ҡара башҡортондай
Ошо уйсан, тыныс ҡаялар
Ҡымшанмай ҙа заман елдәренә
Быуат ашаһынан бағалар!
Күпме тарих һаҡлай ошо таштар –
Бер Аллаһҡа ғына билдәле.
Өнһөҙ-тынһыҙ улар күҙәтәләр
Тормош-йәшәйеште илдәге.
Ирҙәр кеүек һүҙһеҙ. Олпат. Текә.
Иҙел генә буйы – ҡаялыҡ.
Хас ҡындағы хәнйәр – әле тыныс,
Оран ташла – килер саялыҡ!..
Иҙел генә буйы ҡая ла таш –
Һыуҙар йыуа ҡая итәген.
Ошо ерҙә тыуған йәндәр генә
Туң ташты ла яҡын итәлер.
Иҙел генә буйы – текә ҡая,
Борма-борма һыуҙың юлдары.
Ҡая булһын инде киләсәктә
Ергенәмә Бөрйән улдары...