Өләсәй Таңһылыу БАҺАУЕТДИНОВА

Өләсәйҙәр оло була,
Тигән булалар тағы.
Ейән-ейәнсәрем тыуғас,
Ҡайтты ғүмерҙең таңы.
Кире сабыйға әйләндем
Ейәндәр менән бергә.
Ә йәш ултыртып ҡуймаҡсы
Аяҡ бөкләтеп түргә.
Йүгерәбеҙ, һикерәбеҙ,
Бейейбеҙ матур көйгә.
Ҡартайҙым, тип йөрөгәнмен
Йөрәк йәш кенә көйгә.
Ейәндәр етәкләп алып
Илтте бала сағыма.
Ошонан да оло бәхет
Була микән тағы ла?!..