Ун икенсе бала Дуҫлыҡ ордены менән бүләкләнде!

Татарстан Республикаһы Рәйесе Рөстәм Миңлеханов Указы нигеҙендә Башҡортостаныбыҙҙың легендар актрисаһы Сәүиә Ғимаҙислам ҡыҙы Сираева Дуҫлыҡ ордены менән бүләкләнде.

Сәүиә Сираева сәхнәгә сығыу менән, рәссам кеүек, сағыу төҫтәр һәм теүәл һыҙыҡтарҙы ҡулланып, образ тыуҙыра башлай. Шул уҡ ваҡытта оҫта композитор булып, көй ҙә ижад итә. Матур образдары, ролдәре менән тамашасыларҙы ҡыуандыра. Ул ҡатнашҡан спектаклдәр аншлаг менән үтә.

Сәүиә Ғимаҙислам ҡыҙы Рәсәйҙең атҡаҙанған, Башҡортостандың һәм Татарстандың халыҡ артисы, Салауат Юлаев ордены кавалеры, Өфө ҡалаһының почетлы шәхесе. Сәүиә апайҙы ихлас күңелдән ҡотлап, һаулыҡ, оҙон ғүмер, ижади уңыштар теләйбеҙ.

90 йәше менән барған артист әле лә сәхнә түренән төшмәй. Йәштәреңә биргеһеҙ итеп уйнауын дауам итә. Үҙенең ғәжәп образдары менән халыҡтың үҙенә ҡарата һөйөүен арттырғандан-арттыра.   Рәсәйҙең атҡаҙанған, Башҡортостандың һәм Татарстандың халык артисы Сәүиә Сираева  1934 йылда Нуриман районы Иҫке Исай тигән башҡорт ауылында донъяға килә. 

Сәхнә оҫтаһы үҙенең бала сағы хаҡында: “Мин ябай крәҫтиән ғаиләһендә тыуып үҫтем. Атайым колхозда эшләне. Әсәйем ун ике бала тәрбиәләне. Мин иң бәләкәйе инем. Йыш ҡына бергә йыйылып йырлаша, бейешә торғайныҡ. Туғандарымдың һәр ҡайһыһы тормошта үҙенсә актер ине. Күңелле була торғайны! Шул мәлдәрҙең ғүмер буйы дауам итеүен теләр инем...” - ти.

Өфө театр училищеһын (хәҙерге Өфө сәнғәт училищеһы) тамамлаған Сәүиә Сираева актриса эшен 1959 йылда Салауат башҡорт дәүләт драма театрында башлай. 1963 йылдан Мәжит Ғафури исемендәге Башҡорт дәүләт академия драма театрына күсә. Сәүиә Ғимаҙлислам ҡыҙы театрҙарҙа эшләү осоронда 23 йыл буйы балалар өсөн радиотапшырыуҙар алып бара.

1991 йылда ижади эҙләнеүҙәр сәхнә оҫтаһын “Нур” Өфө татар дәүләт драма театрына алып килә. Бында Сәүиә Сираева юғары художество кимәлендәге драматик һәм трагик образдар тыуҙыра. Уның ролдәре сағыулығы, хистәргә бай булыуы менән айырылып тора. Н. Асанбаевтың “Рәйсә” драмаһынан Гөлниса, Х. Ибраһимовтың “Башмағым” комедияһынан Йыһан, Т. Миңнуллиндың “Һаҡлайыҡ әле күңел серҙәрен”, “Ай булмаһа йондоҙ бар” спектаклдәренән Тутыя һәм Рәхимә образдары һ.б. тамашасы күңелендә үҙ урынын тапты.

Фото: Кызыл тан.