Өфөлә «Ел музыкаһы» тип исемләнгән фестиваль үтәсәк

Был хаҡта Башҡортостандың халыҡ артисы Роберт Юлдашев «Рәсәй» матбуғат үҙәгендә уҙғарылған пресс-конференцияла һөйләне.

7-9 февралдә Өфөлә «Ел музыкаһы» тип исемләнгән музыка һәм бейеү фестиваль үтәсәк. Был хаҡта данлыҡлы ҡурайсы, Башҡортостандың халыҡ артисы, Ш.Бабич исемендәге Дәүләт йәштәр премияһы лауреаты, Салауат Юлаев ордены кавалеры Роберт Юлдашев «Рәсәй» матбуғат үҙәгендә уҙғарылған пресс-конференцияла һөйләне.

- Ҡурайһыҙ байрам - байрам түгел. Әгәр унда традицион халыҡ музыка ҡоралдары яңғыраһа ғына, байрам кәйефе күпкә күтәрелә, — тине Роберт Юлдашев.

Өс көн дауамында тере музыка һөйөүселәр Роберт Юлдашевтың һәм «Ҡурайсы» этно-төркөмөнөң сольный концертын тыңлай ала.

- Беҙ таланттар эҙләйбеҙ, әле күп кенә ғаризалар ҡабул ителде. Ҡатнашырға теләүселәр артҡандан-арта бара. Был аҙнала беҙ һайлап алыуҙы тамамлайбыҙ, — тип белдерҙе фестивалде ойоштороусы, концерт директоры Регина Агилова.

Фестиваль "Башҡортостан" Дәүләт концерт залында уҙғарыласаҡ.