Йыл шағиры булдым Венер ИСХАҠОВ

Тиҙҙән Яңы йыл байрамы етә. Бөтә ерҙә төрлө шәп кешеләрҙе барлап, гөж киләләр: йыл йырсыһы, “йыл кешеһе”, “йыл оҫтаһы”, “йыл эшҡыуары”, “йыл матуры”... Тағы әллә ниндәй лайыҡлы әҙәмдәрҙе асыҡлайҙар. Интернет шулар менән тулған. Компьютер алдына ултырыр әмәл юҡ, ғүмере белмәгән, барлығын ишетмәгән әҙәмдәрҙән, уларҙың нәҫел-нәсәбенән, ҡоҙа-ҡоҙағыҙарынан  үтенес менән СМС-тар яуа. Ул вацаптан. "Фәлән конкурста ҡатнашам.  Мин иң шәбе булырға тейеш. Зинһар, миңә ярҙам итегеҙ әле. Тауышығыҙҙы биреү өсөн ошо һылтанмаға баҫығыҙ. Үҙегеҙ генә тауыш биреп ҡалмағыҙ, бүтәндәргә лә таратығыҙ. Алдан уҡ ҙур рәхмәт белдерәм".

Шулай ултыра торғас, минең дә башыма бер шәп уй килде. Бәй, ниңә мин дә шундай ярышта ҡатнашмайым әле? Башҡаларҙан ҡайһы ерем кәм? Артыҡ булмаһам әле! Уныһы шулай ҙа ул, тик бына нимә буйынса үҙемде тәҡдим итергә? Бер ҡараһаң, бөтә яҡтан да килгәнмен кеүек. Ҡунаҡтарҙа әҙ-мәҙ кәгеп алһам, йырлайым да, бейейем дә. Маҡтайҙар.
– Тағы ла йырла! – тиҙәр. – Һин барҙа ысын әртистәр ял итһен.

Дәртләнеп, ер һелкетеп бейергә төшөп китһәм дә, һис берәүҙең яманлағаны юҡ. Тәк-тәк, ҡайһыһын һайларға һуң? Ә-ә-ә, иң һыйлыһы – шиғыр буйынса бәйгелә ҡатнашыу. Күптән яҙған өс күплетлыҡ шиғырым бар.
Һалҡын ҡыш етте,
Күп итеп ҡар яуҙы.
Ҡуяндар күптән
Аҡ тунын кейҙе.
Ҡыш булғас, рәхәт.
Сана шыуабыҙ.
Ҙур рәхмәт һиңә,
Ҡыш бабайыбыҙ!

Бер уйлаһаң, шиғри һәләтең булмаһа ла, зарар юҡ. Унда “Йөрәк һүҙе”ндәге һымаҡ ҡулды болғай-болғай шиғыр һөйләйһе түгел. Интернетҡа һинең хаҡта яҙалар ҙа, шуға бүтәндәрҙең тауыш биреүе мөһим. Кем иң күп тауыш йыя – шул еңеүсе! Йыл таланты, йыл асышы. Шәп бит! Өфөгә саҡырып, бөтә ғәм алдында бүләк тотторалар. Аҙаҡ гәзиттәрҙә яҙалар, телевизорҙан күрһәтәләр. Китә дан!..

Эште оҙон-оҙаҡҡа һуҙмай үҙем хаҡында тейешле мәғлүмәт осорҙом. Бер ни ҡәҙәр ваҡыттан һуң ул баҫылып та сыҡты. Хәҙер донъя буйлап таралған дуҫ-иштәргә, дуҫ булмағандарға үтенес менән смс-тар ебәрәм. Уныһы өсөн борсолаһы түгел. Әлегә эшһеҙ ятам, ваҡыт күп. "Фәлән конкурста ҡатнашам. Зинһар, ярҙам итегеҙ әле. Тауышығыҙҙы биреү өсөн ошо һылтанмаға баҫығыҙ. Үҙегеҙ генә тауыш биреп ҡалмағыҙ, бүтәндәргә лә таратығыҙ. Тауыш биреү төгән көндә фәлән сәғәттә тамамлана. Алдан уҡ ҙур рәхмәт белдерәм!"

Шуныһы яҡшы – бөтә һандар күҙ алдында. Бер мәл ҡарайым – берәү минең тауыш кимәленә яҡынлашып килә. Юҡ, былай булмай, еңәм тигәс, еңәм. Был арала йүнле йоҡо күргән дә юҡ. Дуҫтар йыям, уларға баяғы үтенесте ебәрәм. Атай-әсәйем, ағайым-еңгәйҙәремә, апай-еҙнәйҙәрем, ҡатыныма, балаларыма, уларҙың класташтарына  тыныс тормош бөттө.  Ауылдаштар, класташтар, группалаштар, ырыуҙаштар, нәҫел-нәсәп чаттары шартлап бара. Һәр береһе минең өсөн тырыша. Улары тағы үтенес осора. Бөтәһенең дә класташтар, бергә эшләгәндәр, серҙәштәр һәм бүтән йөҙ төрлө башҡа ла кермәгән чаттары бар. 

Дөрөҫ эшләйҙәр, шиғыр яҙыу буйынса “Йыл шағиры” номинацияһында еңеп сыҡһам, уларға ла дан бит. Кемдең ҡустыһы – шуныҡы! Кемдең балаһы – фәләндеке! Шул райондыҡы! Ауылда, дуҫтар араһында даны ни тора! Мин бит республикала үҙемде генә түгел, район, ауыл, зат-ырыу данын күрһәтәм.

Эшләһәң, эш ҡарышмай, тигәндәре дөрөҫ икән. Дуҫтарыма рәхмәт. Егерме көн буйы егерме кеше айҡашҡан   ярышта барыһын да һыпыртып уҙып, тәки беренсе урынды алдым. Хатта билдәле, дәрәжәле кешеләрҙе лә уҙып киттем. Иң күп тауышты мин йыйҙым, бөтәһен дә әллә күпмегә артта ҡалдырҙым. Кемдең кем булыуын халыҡ үҙе ғәҙел баһаланы.
Бына әле Өфөләге мәҙәниәт һарайында үткән бүләкләү тантанаһынан ҡайтып киләм. Сәхнә түренә саҡырып, бүләктәр, диплом биреп, ҡулымды ҡыҫ­тылар. “Йыл шағиры” номина­цияһында беренсе урынды алдым бит! Ҡотлағыҙ мине!