20 йәшлек батыр

2022 йылда илдә өлөшләтә мобилизация иғлан ителеү менән 20 йәшлек “Гиви” һис икеләнеүһеҙ Ватан һағына баҫа.

Махсус хәрби операцияла ҡатнашыусылар араһында студент тормошон яңы ғына тамамлап, киләсәккә пландар ҡороп, һөнәрҙәр үҙләштергән йәштәр ҙә бар. Шулар араһында “Гиви” позывнойлы яугир өсөн дә Тыуған ил, бурыс, намыҫ төшөнсәһе буш һүҙ түгел, ә ғүмер юлының бер мөһим өлөшө.

Иҫке Балтастағы 1-се урта мәктәпте тамамлағандан һуң, егет ауыл хужалығы колледжына уҡырға инә һәм автомеханик профессияһына эйә  була. Ул техника менән бала саҡтан мауыға, яңылыҡтарҙы тиҙ үҙләштерә.

Армия хеҙмәтен Балашиха ҡалаһында үтә, тап ошонда характеры нығый, күнекмәләр, дисциплина, үҙ көсөнә ышаныс уны сыныҡтыра. 2022 йылда илдә өлөшләтә мобилизация иғлан ителеү менән 20 йәшлек “Гиви” һис икеләнеүһеҙ Ватан һағына баҫа. Хеҙмәтте “Башҡортостан” мотоуҡсылар полкында өлкән уҡсы вазифаһында башлай, алғы һыҙыҡта үҙен ҡыйыу һәм ышаныслы яугир итеп күрһәтә.

Алыштарҙың береһендә “Гиви” етди яралана. Ауыр һынау ҙа уны һындыра алмай, Тыуған илгә хеҙмәт итеүен дауам итә. Ҡаһарманлығы өсөн “II дәрәжә хәрби батырлыҡ” миҙалы менән наградлана.

Хәҙерге заман һуғыштары батырлыҡтан тыш, юғары техник күнекмәләр, белем талап итә. 2024 йылда “Гиви” пилотһыҙ осоу аппараттары менән идара итеүҙе үҙләштерә һәм FRV-дроны механигы булып китә, тип яҙа “Балтач таңнары”.

Әлеге ваҡытта бындай белгестәрҙе хәҙерге заман ғәскәрҙәренең элитаһы тип атарға мөмкин. Теүәллек, түҙемлек, яҡшы реакция һәм тәрән техник белем алғы һыҙыҡтағы иң ҡатмарлы бурыстарҙы хәл итергә ярҙам итә.

Сираттағы ауыр яра ла яугирҙең рухын һындырмаған, ул яҡташтары өсөн ҡаһарманлыҡ һәм оптимизм өлгөһө  булып ҡала. Йәш яугирҙең тарихы  – ул ябай булмаған ваҡытта Тыуған илгә тоғролоғон һәм һөйөүен иҫбатлаған  быуындың  тарихы. “Гиви” кеүек егеттәр эргәбеҙҙә булғанда илебеҙ һәр саҡ ышаныслы ҡалҡан аҫтында буласаҡ.

Пилотһыҙ осоу операторҙары бөгөн армияла бик мөһим төп белгеслектәрҙең береһе. Улар разведка алып барырға, штурм төркөмдәренә ярҙам итергә, хәрбиҙәрҙең ғүмерен һаҡлап ҡалырға ярҙам итә. Пилотһыҙ осоу аппараттары операторҙары өсөн юғары хәүефһеҙлек саралары ҡаралған. Уларҙың хеҙмәте алғы һыҙыҡтан алыҫ ерҙә үтә. Оборона министрлығы һығылмалы хеҙмәт срогын тәҡдим итә. Контракт бер йылдан алып төҙөлә, был хеҙмәт үҙенсәлектәрен баһаларға мөмкинлек бирә. Хәрби кеше хеҙмәттән китә йәки яңы контракт  төҙөй ала.

Яугирҙәргә белгеслектәрҙе һаҡлау гарантиялана. Хәрбиҙе, уның ризалығынан тыш, пилотһыҙ осоу аппараттары менән бәйләнмәгән башҡа белгеслеккә йәки ғәскәрҙәрҙең башҡа төрөнә күсерергә ярамай

Был өлкәләге контрактниктар тулы социаль пакет ала. Уларға закон тарафынан ҡаралған бөтә түләүҙәр, льготалар, социаль гарантиялар ҡағыла. Бынан тыш, студенттар өсөн махсус шарттар ҡаралған. Вуздарҙа уҡыусылар, академик ял алып, контракт төҙөргә хоҡуҡлы, ә хеҙмәттән һуң бюджетҡа уҡырға инә аласаҡ.

Фото: “Балтач таңнары”.