+1 °С
Болотло
Бөтә яңылыҡтар
Илһам
30 Октябрь 2018, 12:15
Нәркәс Ҡәйепҡолова шиғырҙары № 10, 2018
Беҙ кем?
Беҙ - кешеләр! -тибеҙ,
Тик сифаттар тура киләме?
Нисә быуат үҫеш кисерһәк тә,
Һаман ҡанлы ерҙең келәме...
Матурая тормош, йорттар үҫә.
Тик нәфсеһе туймай әҙәмдең:
Тыныслыҡты боҙоп, яуҙар менән
Һүндерәлер уттарын йәндең.
Йә тәбиғәт менән алыш бара,
Имеш, Ерҙә хужа тик кеше...
Асыуланһа әгәр Ер-әсәбеҙ,
Кемгә тейер асыу өлөшө?
Бөгөнгөбөҙ менән киләсәктең
Бәйләнеше сыҡһа хәтерҙән,
Нимә ҡалыр?
Ниндәй һөҙөмтәләр
Йылдар үтә торғас, көтөрҙәр?
Камил йәндәй күреп үҙебеҙҙе
Башҡаһынан өҫтөн ҡарайбыҙ.
Тоймаймы ни улар ауыртыуҙы
Әйбер кеүек ташлаған һайын?
Ерҙә урын тапмай, күк йөҙөн дә
Бысратырға етә ҡулыбыҙ.
Бер әйләнеп, башҡа төшмәҫ, тимә
Кисә өҫкә атҡан уғыбыҙ...
Риза булмай, ыуаҡ-сыуаҡҡа ла
Зарланырға һәр кем күнеккән.
Ә ҡайҙалыр бер нимәһеҙ ярлы
Һыу тултыра тишек күнәккә...
Беҙ кем?
Беҙ - кешеләр, тибеҙ.
Лайыҡ микән кеше исеме?
Юғалтҡанбыҙ дөрөҫ юлыбыҙҙы,
Айырмайбыҙ оло-кесене...
ҒАШИҠ ИТТЕР
Яратмайһың, тимә.
Ғашиҡ иттер,
Көн һайын да йылыңды бүлеп,
Күңел дә бит ҡояшҡа тартыла,
Һис һыуыҡ ҡараңғыға түгел.
Ғашиҡ иттер.
Ҡиәфәтең түгел,
Йәнең булһын иң-иң яҡыны,
Шатлығымдың һис тә сиге булмаҫ,
Ҡулдарымда тойһам йылыңды.
Ишетәйем яндарыңда саҡта
Йөрәгеңдең һәр бер тибешен.
Күҙҙәреңдә йыһанды күрәйем,
Һәм әйтәйем: “Һин минең ишем...”
Шундай мөһим һәм дә шундай ауыр
Һиңә яҙған кешене табыу.
Бәлки, һиндер яҙмышым бәхете,
Йәнем өсөн буласаҡ дауам.
Һөйәһеңме, тимә.
Яуап көтмә.
Күҙҙәремә ҡара бары тик.
Унда хисем, мөхәббәтем һыйған,
Йылдар буйы йыйған һиңә тип.
Читайте нас:
© 2024 «Шоңҡар» - Башҡортостан йәштәренәң ижтимағи-сәйәси, әҙәби-нәфис журналы
Баш мөхәррир: Айгиз Ғиззәт улы Баймөхәмәтов
Телефон
(347)272-61-64
Электрон почта
Адресы
450079, Республика Башкортостан, г. Уфа, ул. 50 летия Октября, 13, каб. 910
Ҡабул итеү бүлмәһе
Венер Айҙар улы Исхаҡов (яуаплы сәркәтип) - 89279443170
Хеҙмәттәшлек
Финзира Ғариф ҡыҙы Рысаева - 89174785622