+13 °С
Болотло
Бөтә яңылыҡтар
Илһам
29 Ғинуар 2019, 18:30
Марат Кәримов шиғырҙары
Юҡ, йондоҙҙар вәғәҙә итмәйем мин,Ай, Ҡояш та вәғәҙә итмәйем.
Матур булыр был әкиәт, шикләнеү юҡ.
Әкиәттәрҙең әле насар бөткәне юҡ
Әкиәт ҡыҙы
Матурҙарҙы быға саҡлы күргәнем бар,
Күргәнем бар, хайран ҡалып йөрөгәнем бар.
Шаһит итеп саҡырамын Ҡояшты мин,
Күргәнем юҡ ләкин һиңә оҡшашты мин!
Һин әкиәт ҡыҙы, буғай – ергә килгән.
Минең бәхет һинең менән бергә килгән.
Ғәжәпләнәм хәҙер көсөм артыуына,
Әйләндемме әллә әкиәт батырына?
Беҙҙең яҙмыш кергән бер үк әкиәткә.
Юрайыҡсы, әйҙә, уны тик һәйбәткә.
Матур булыр был әкиәт, шикләнеү юҡ.
Әкиәттәрҙең әле насар бөткәне юҡ.
Атлантида
Легендалар һөйләй: сәскә атҡан
Бер материк булған –
Атлантида.
Шатлыҡ ҡунған унда, бәхет ҡунған,
Бөтә яҡтан уңған
Атлантида.
Ҡәҙеремде кеше белерме, тип
Оҙаҡ-оҙаҡ көткән
Атлантида.
Һәм, ахырҙа, сабырлығы бөткән –
Һыу аҫтына киткән
Атлантида.
Нисә быуат эҙләй уны кеше:
“Ҡайҙа һуң һин,
Шиғри Атлантида?”
Юҡ, яуап юҡ, эҙләмәгеҙ уны,
Юғалған ул
Сихри Атлантида.
Икебеҙгә уртаҡ бәхет килде,
Ул мәңгегә беҙҙе тапҡан, тимә.
Һаҡ булмаһаҡ, бик тиҙ юғалтырбыҙ.
Бер юғалған бәхет –
Атлантида.
Һин яңы. Мин яңы
Үпкәләмә минең үткәнемә,
Үпкәнемә бүтән берәүҙе.
Мин ул саҡта башҡа кеше инем,
Хәҙер донъя башҡа – үҙгәрҙе.
Мин дә хәҙер өр-яңынан тыуҙым,
Һәм яңыса һөйәм донъяны.
Бөтә нәмә яңы, ғазап яңы,
Шатлыҡ яңы, сөнки һин яңы.
Үткәнде мин ҡуйыныма һалдым,
Йөрөй бирһен йөрәк-янсыҡта.
Үпкәләмә миңә, әгәр уны
Ҡарап ҡуйһам ҡай саҡ танһыҡҡа.
Был үткәнен һағыналыр, тимә,
Ни әйтһәң дә, күңел – күңел бит.
Үткән менән бәхетһеҙҙәр йәшәй,
Ә беҙ уға мохтаж түгел бит.
Уртаҡ шатлыҡ, уртаҡ ғазап татып
Йәшәр өсөн килдек беҙ ергә.
Үткәнебеҙ уртаҡ түгел беҙҙең,
Киләсәктәр уртаҡ – беҙ бергә!
Йөрәгемде бирәм
Юҡ,
Йондоҙҙар вәғәҙә итмәйем мин,
Ай, Ҡояш та вәғәҙә итмәйем.
Йондоҙ йыраҡ,
Айға буйым етмәҫ,
Мин бер ябай кеше бит, йәнем.
Йөрәгемде генә бирәм һиңә,
Һин табырһың унда барын да.
Ай моңо ла,
Ҡояш шатлығы ла,
Йондоҙ хыялы ла бар унда.
Мөхәббәт
Башта миңә үҙең килдең
Рөхсәт-маҙар һорап тормай.
Күңелемдең ишеген астың,
Йөрәк итен тырнай-тырнай.
Үҙең менән ни килтерҙең?
Ғазап тулы көн килтерҙең.
Аңды алып, яндарыма
Йәр булыр, тип кем килтерҙең?
Килтерҙең дә юғалдың һин,
Һинән хәҙер күңелем азат.
Нисә йылдар тынысмын мин.
Ҡайҙа икән татлы ғазап?
Һиңә хәҙер үҙем килдем,
Башты эйеп, ишек ҡағам.
- Әйҙә, йәшә минең менән,
Тыныслыҡтан туйҙым тамам.
Йөрәгемде тырна, ҡанат
Һуңғы ҡабат… һуңғы ҡабат…
***
Был уҙған йыл – һинең, минең йыл ул,
Икебеҙҙе шул йыл үҙ итте.
Бар көндәрем һинең менән үтте,
Тик ниңәлер бигерәк тиҙ үтте.
Ә килгән йыл уртаҡ булалманы –
Һин үҙеңә башҡа,
мин башҡа.
Бер һүҙем юҡ,
әйҙә, йылмая бир
Болотло көн сыҡҡан ҡояшҡа.
Хәҙер түгел,
ик белерһең аҙаҡ:
Аяҙ көндө күңел яҡтыраҡ.
Яңы бәхет теләм әйем һиңә,
Иҫке бәхетең барыбер яҡшыраҡ…
Шул етә
Ерҙә һин бар, ерҙә тағы мин бар,
Һин бар ерҙә һөйөү ярала.
Хистәремдең илселәре булып,
Һүҙҙәр генә йөрөнө арала.
Минән – һиңә, һинән миңә йөрөп,
Ул илселәр тамам оҫтарҙы.
Хәҙер инде күңелем штатында
Ундай вазифа юҡ – ҡыҫҡарҙы.
Юҡ, был түгел һинән һыуыныу ҙа,
Беребеҙҙән беребеҙ туйыу ҙа.
Миндә - һин бар хәҙер, һиндә - мин бар,
Миңә етә шуны тойоу ҙа…
Һағынам
Йылы елдәр иҫкән саҡта
Йәшлегемдең яҙынан,
Һине, тәүге мөхәббәтем,
Һағынам мин, һағынам.
Хәтерҙәге осҡондан да
Усаҡ булып ҡабынам.
Шул усаҡта яна-яна
Һағынам гел, һағынам.
Яндарыңа осорға тип
Ҡоштай ҡанат ҡағынам.
Үткәндәргә осоп булмай,
Һағынам тик, һағынам.
Тәүге хисте һаҡлай алған
Ғашиҡтарға табынам.
Бер юғалтҡан һөйөүемде
Ғүмер буйы һағынам…
Яратам!
Осраттым мин һине
Йәшлегем юлында.
Ә һинең яҙмышың
Башҡаның ҡулында.
Тыйылған һөйөүгә
Ни генә янамай!
Ярамай, тиһең һин,
Ярамай, ярамай!
Сығыр тип ҡурҡаһың
Ыҙғышмы, боламы.
Һөйөүҙе кешенән
Йәшереп буламы?!
Ишетһен бар донъя,
Донъяны яңғыратам:
Яратам мин һине,
Яратам, яратам!
Читайте нас:
© 2024 «Шоңҡар» - Башҡортостан йәштәренәң ижтимағи-сәйәси, әҙәби-нәфис журналы
Баш мөхәррир: Айгиз Ғиззәт улы Баймөхәмәтов
Телефон
(347)272-61-64
Электрон почта
Адресы
450079, Республика Башкортостан, г. Уфа, ул. 50 летия Октября, 13, каб. 910
Ҡабул итеү бүлмәһе
Венер Айҙар улы Исхаҡов (яуаплы сәркәтип) - 89279443170
Хеҙмәттәшлек
Финзира Ғариф ҡыҙы Рысаева - 89174785622