-3 °С
Ҡар
Бөтә яңылыҡтар
Илһам
29 Август 2019, 17:52
Һөйөү өсөн етер көскенәм...
Бөгөн бер юлы ике китап сыҡҡан икән! Тағы ла бер шәп ҡәләмдәшебеҙ, йәш шағирә, «Башҡортостан» гәзите хәбәрсеһе Айгөл Йәмилеваны өр-яңы китабы сығыу менән ҡотларға ашығабыҙ! Уңыштар йәштәргә!#Шоңҡаржурналы #ДинәСолтанова #АйгөлЙәмилева
ЯҠЫНЫМА
Ике ҡаршылыҡтар тартылалар
Физикалағы заряд шикелле.
Шуға күрәлерме ярһыу йөрәк
Ҡабатлай тик һинең исемде...
Шуға күрә һәр бер иртә һайын
Һине тәүләп килә күрәһе.
Ҡулға-ҡул тотоноп йондоҙ аша
Беҙгә һаман бергә еләһе!
Һин боҙ булһаң,
Мин – дөрләп яныр ялҡын,
Туңа ҡалһам, тоҡанаһың үҙең.
Икебеҙгә ике донъя ла бит,
Айырым йәшәргә лә етмәй түҙем.
Ике төрлө,
Ҡапма-ҡаршылыҡлы
Йәнбеҙ ҙә бит һөйөү усағында.
Тик ниңә һуң ике төрлө булғас,
Мин бәхетле бары
Һинең,
Һинең генә
Танһыҡ ҡосағыңда?
Плюс һәм минус. Физикалағы
Ике төрлө заряд шикелле.
Шуға күрәлерме ярһыу йөрәк
Ҡабатлай тик һинең исемде.
****
Һинән яҡыныраҡ кемем бар һуң минең:
Төпһөҙ күңел күле шайтандарын
Эйәләштергән үҙенең ҡулына?
Һинең ҡәҙерлерәк кемең бар һуң минән:
Йоҡо алдынан иренеңдән үпкән,
Доға һипкән йөрөр юлыңа?..
Килтер миңә яҙҙы, сәскә итеп
Осҡон итеп иркә ҡараштан.
Мин ирермен шунан.
Көндәр буйы
Көнитмештән арып ҡаны ҡасҡан
Иренемдә балҡыр йылмайыуым,
Ун ете йәшлек, эйе, йылмайыуым.
Һин бит – уны өҙөлөп яратҡан.
Һөйләр хәбәрҙәр ҙә күбәйгәндер,
Төндән ҡаты итеп бер сынаяҡ сәйҙе
Яһайыҡ та әйҙә серләшәйек.
Әйтелмәгән үпкәләр ҙә ҡалған.
Йәшбеҙ әле, үтә дыуамалбыҙ.
Шәмәрт марттың ер иреткән сағы.
Күтәрелеп ҡара – күге ниндәй бейек...
Шул күк йөҙөнән күкрәү үткән мәлдә
Араларҙа йәшен йәшнәһен.
Яңырыр ҙа донъя, йәшлегебеҙ
Ҡойондорор икебеҙҙең өҫкә
Һәр тамсыһы шифа ләйсәнен.
Туҡталыштар әллә нисәү булыр,
Борма юлдар илтер үрҙәргә.
Тик үрҙәре игеҙ, тиң булһын да,
Тарих булһын аҙаҡ йылдар аҡҡас,
Ҡыҙыбыҙға ихлас һөйләргә.
Ауыр көндөң көс етмәҫлек йөгө
Таштар булып баҫҡан аяҡтарҙы.
Яңыртайымсы ҡана сәйнүкте.
Тыным менән һиҙәм:
Ҡайтып киләң.
Ҡаршы барып, сабыр көтөп торам
Үҙ артыңдан ҡалдырып эш көнөңдө
Асып инеүеңде ишекте.
ҺИҢӘ ЮЛҒА
Һиңә юлға. Әйтерһең дә,
Тәүге тапҡыр хушлашабыҙ.
Ҡыйын.
Өфө түгел, бөтә донъя бушай
Һине оҙатып тороп ҡалған һайын.
"Күргәндәй ҙә булманым бит әле...
Һаҡла үҙеңде, һин бит беҙгә терәк".
Һүҙҙәр талғын, тик күҙҙәрҙә йәш тә,
Эй һыҙыла һағыштарҙан йөрәк.
Һиңә юлға. Яҙмыш ҡушыуымы –
Беҙҙең ғүмер тора шул юлдарҙан.
Инде өйрәнелде тигәндә йәнә
Ҡулдар ысҡыналар ҡулдарҙан.
Һиңә юлға. Имен-аман йөрө.
Ваҡыт әфәнде,
булсы йәһәтерәк...
Ҡосағыңдан һурылып сығам да,
"Һау бул" урынына
Шыбырлайым:
"Һин һаман да миңә кәрәк.
Кәрәк".
***
Мыжығас та, илағас та әллә
Көсһөҙ, тимә. Көсөм етерлек.
Туңһам туңам, ғазабымды ғына
Сит-яттарға белдермәйем тик.
Ә һин минең
иң-иң яҡын кешем,
Ҡуш ҡанатым, ярты йәнемһең.
Яҙыҡ түгел шуға күреүҙәрең
Тәгәрәгәнен әсе йәшемдең.
Һинең алда мин –
Хыялый ҡыҙ ҙа,
Көйһөҙ, асыулы ҡатҡыл ҡатын да.
Бергә тәгәрәйбеҙ упҡындарға,
Бергә еләбеҙ күктең ҡатына.
Түҙмәй, тимә, яҙмыш әфәнденең
Әсе елдәренә. Мин — көслө.
Һин янымда саҡта донъям тыныс.
Һинең менән генә мин хисле.
Бөтә донъя һиңә ҡаршы торһа,
Ҡалҡан итеп ошо Һөйөүҙе
Ҡулдарыңды ҡыпһыуырҙай ҡыҫып
Яҡларға әҙермен һинең исемде.
Ҡара төндә йондоҙ яҡтыһы ла
Килеп етмәй һүнеп ҡалғанда
Мин усағың булып яныр инем.
Тик юғалма берүк янымдан.
Мин әҙермен һинең өсөн генә
Юлһыҙ ерҙән һуҡмаҡ ярырға.
Нескә заттан, тиеп яңылышаһың.
Беҙ көслөбөҙ һөйөү барында.
Һөрткән саҡта әсе йәштәремде,
Үпкән саҡта сыланған сикәнән
Бел һин: наҙым һиңә етһә,
Һөйөү өсөн етер көскенәм,
Түҙер өсөн етер көскенәм.
Читайте нас:
© 2024 «Шоңҡар» - Башҡортостан йәштәренәң ижтимағи-сәйәси, әҙәби-нәфис журналы
Баш мөхәррир: Айгиз Ғиззәт улы Баймөхәмәтов
Телефон
(347)272-61-64
Электрон почта
Адресы
450079, Республика Башкортостан, г. Уфа, ул. 50 летия Октября, 13, каб. 910
Ҡабул итеү бүлмәһе
Венер Айҙар улы Исхаҡов (яуаплы сәркәтип) - 89279443170
Хеҙмәттәшлек
Финзира Ғариф ҡыҙы Рысаева - 89174785622