- Стәрлетамаҡ ҡалаһында башта Тимер юлсылар мәҙәниәт һарайына урынлаштым. СМП-185 төҙөлөш ойошмаһында кино күрһәттем, бер үк ваҡытта уйындар, концерттар ойоштороп йөрөнөм. Ошо осорҙа Стәрлетамаҡ ҡалаһының мәҙәни, әҙәби тормошо гөрләп торҙо, әҙәби әҫәрҙәргә ныҡлап тотоноп китеүемә лә ошондай ижади мөхит йоғонто яһамай ҡалмағандыр, тим. Тимер юлсылар мәҙәниәт һарайында “Аулаҡ өй” кисәләре уҙғара инек. Шул осорҙа бик күп шәхестәр менән яҡындан аралашырға, ҡайһы берҙәре менән айырылғыһыҙ дуҫ булырға насип булды. Стәрлетамаҡ яҙыусылар берлегендә Вил Ғүмәров, Рауил Ниғмәтуллин, Зөбәржәт Йәнбирҙина, Кәбир Аҡбашев, Кәрим Булат, Асия Басирова, Рәшиҙә Шәмсетдинова кеүек шағирҙар, яҙыусылар менән аралашып йәшәнем, улар менән бергә ижад иттем, шиғырҙарына йырҙар яҙҙым. Кәбир Аҡбашев ул осорҙа Стәрлетамаҡ радиоһында эшләй ине, тәүге йырҙарым уның ярҙамы менән радио аша халыҡҡа еткерелде. Кәбир Аҡбашев миңә “Ғимрани” ҡушаматы таҡты ла инде. Һуңынан йыр китаптары сығарғанда исем-шәрифемде ул ҡушҡанса “Рәмил Ғимрани” тип яҙа башланым. Йырҙарымды йырсыларға тәҡдим итеп йөрөгәнем булманы. Бөгөн алтмышлаған профессиональ йырсы уларҙы яратып башҡара. Һуңғы йылдарҙа ауылдарҙа “Һаумыһығыҙ, ауылдаштар!” байрамы уҙғарыла, ошо байрамдар алдынан халыҡ һорауы буйынса ауылдарға арнап йырҙар яҙа башланым. Тәүгеһе Сәйетбаба ауылына арналһа, һуңынан Юлыҡ, ғөмүмән, 40-лап ауылға арнап йырҙар яҙҙым. 10 китап авторымын. Кескәйҙәргә арналған “Хәрефтәр һөйләшә” исемле китабым З.Биишева исемендәге “Китап” нәшриәтендә 2020 йылда баҫылып сыҡты. “Төйәгемдә таң” исемле шиғырҙар йыйынтығым шулай уҡ китап булып баҫылырға сират көтә. Шиғыр, хикәйәләрҙән тыш сәхнә әҫәрҙәре лә яҙам. “Ҡайтырмын, әсәйем!” исемле драмамды Ғафури халыҡ театры сәхнәгә сығармаҡсы, - тип үҙенең үткәне һәм бөгөнгөһө менән таныштыра Рәмил Ғимрани.
Ул һәр ерҙә үҙен сағыу таланты, һәләте менән балҡыған шәхес, йырсы, музыкант, композитор, шағир һәм уҡытыусы итеп танытты.
Башҡортостан Республикаһының атҡаҙанған мәҙәниәт хеҙмәткәре, шағир һәм композитор Рәмил Ғимрани былтыр пандемия арҡаһында үткәрелмәй ҡалған юбилей кисәһен ошо көндәрҙә Ғафури район мәҙәниәт һарайында ижадташ дуҫтарын, яратҡан тамашасыларын бергә йыйып үткәрҙе.