Мең айҙан да хәйерле төн

Риүәйәт ителеүенсә, Пәйғәмбәребеҙ ﷺ, Ҡәҙер төнөн көтөп, рамаҙан айының беренсе ун көнөндә, аҙаҡ киләһе ун көнөндә мәсеттә иғтикәф ҡылған («иғтикәф» – ғибәҙәт ҡылыу маҡсаты менән мәсеттә аулаҡта ҡалыу). Бынан һуң уға: «Был Төн рамаҙандың һуңғы ун көнлөгөндәлер, шуға күрә мәсеттә рамаҙандың һуңғы ун көнөндә иғтикәф ҡыл», – тип әйтелгән (әл-Бохари һәм Мөслимдең хәҙис йыйынтыҡтарынан).

Ә инде Аллаһ Тәғәләнең был Төндө билдәле бер көнгә бәйләмәүе юҡҡа ғына түгел. Мәҫәлән, Ҡәҙер төнөн эҙләгәндә кемдең кем икәне күренә: ихласлыҡ менән был Төндө эҙләгән кешегә Ҡәҙер төнөн тап итер өсөн ун төн буйына ғибәҙәт ҡылыу бер ниндәй ҙә ҡыйынлыҡ тыуҙырмаһа, ғибәҙәт ҡылыуҙа ялҡауыраҡ кеше иһә бер Төн өсөн генә ун төндө ғибәҙәттә үткәрергә йыбанасаҡ.

Ә был Төн нимәһе менән әһәмиәтле һуң? Нимәгә уны бөтә мосолмандар ҙа түҙемһеҙләнеп көтә?

Беренсенән, Аллаһ был Төндә бөтә кешелек өсөн хаҡ ҡулланма булған һәм был донъяла ла, Ахирәттә лә бәхеткә ирештергән Ҡөрьән-Кәримде индергән.

Икенсенән, Аллаһтың «Ҡәҙер төнөнөң ни икәнен һиңә ҡайҙан белергә?» тигән һүҙҙәре был төндөң бөйөклөгөнә ишара.

Өсөнсөнән, был Төн мең айҙан да хәйерлерәк.

Дүртенсенән, был Төндә изгелек, бәрәкәт һәм рәхмәт менән фәрештәләр төшә.

Бишенсенән, был Төн язаларҙан һәм ғазаптарҙан имен.

Алтынсынан, Аллаһ был Төн хаҡында Ҡиәмәт көнөнә тиклем уҡыласаҡ тотош бер сүрәне назил ҡылған. Нәҡ ошо сүрәлә Ҡәҙер төнөнөң үрҙә һаналып киткән фазыләттәре телгә алына.

Бынан тыш, бер хәҙистә риүәйәт ителеүенсә, «Кем был Төндө әжер-сауаптарға өмөт менән ғибәҙәттә үткәрә, шуның әүәлге яҙыҡ эштәре ярлыҡаныр»