Бөтә яңылыҡтар
Әкәмәт
29 Март 2019, 00:04

Ҡәҙерле ҡунаҡтар

Иртәгәһен иртүк, кире ҡайтып, эшкә йыйынып йөрөгәндә, Әлфинур Мәүлитовна: – Рәмилә балаҡайым, ҡайһы уҡыу йортона алып барып индерһәң дә ризабыҙ. Редакцияла эшләгән кешенең таныштары күп була, – тип тағы күҙҙәрен мөлдөрәтте.

Эш көнө аҙағында ҡапыл телефон шылтыраны:

– Әллеү, был редакциямы?
– Эйе.
– Балаҡайым, исемең кем әле?
– Рәмилә…
– Ҡара әле, Рәмилә ҡыҙым, мин кеҫә телефонынан шылтыратам, оҙаҡ һөйләшә алмайым. Беҙ ауылдан автобуста килә ятабыҙ. Ярты сәғәттән автовокзалдан беҙҙе ҡаршы ал, йәме, – тип кенә әйтеп өлгөрҙө, бәйләнеш тигәнең өҙөлөп тә ҡуйҙы.
«Бына һиңә мә, үҙенең кем булыуын да әйтмәне. Ҡаршы ала аламмы, юҡмы икәнлекте лә һораманы», – тип Рәмилә бер аҙ аптырап торғас, иренә шылтыратып, эштән һуңыраҡ ҡайтасағын иҫкәртте. Фаилының:
– Нимә булды? Эштән һуң киноға барырға һөйләшкәнек бит – тиеүенә серле итеп:
– Сюрприз! – тип яуапланы.
Ауылдан килгән кеше тейәнеп йөрөй торған, тип Рәмилә артыҡ йөк күтәреүҙән һаҡланып, такси саҡыртты. Юлдан арып килгән ҡунаҡты трамвайҙа йонсотоп йөрөткәнсе, уңай ҙа булыр. Автовокзалға килеп етеүҙәре булды, ике ҡыҙыҡай эйәрткән йыуантыҡ ҡына ханым былар янына йүгереп килде:
– Редакциянанмы? Әй, исемеңде тағы онотоп торам… – тип, яуап биргәнде лә көтмәй машинаға инеп ултырҙы. Рәмилә күҙҙәрен сылт-сылт йомоп, нимәлер онотҡандай, бер аҙға телһеҙ ҡалды. Кем әле был? Бер ҙә төҫмөрләмәйсе. Моғайын, иренең берәй туғаны, йә ауылдашы. Ҡайһылыр бер апаһы туйҙа була алмай ҡалған, үҙе Өфөгә юл төшкәндә инеп ҡотлап ҡайтырмын, тип әйткән, тип ҡәйнәһе нимәлер һөйләгәндәй булғайны шикелле. Бәлки, шулдыр ҙа.
– Ауыр сумкаларығыҙ юҡмы, багажникка ҡуйырға була…
– Юҡ, юҡ. Артыҡ нәмәләр тейәп йөрөргә бында… Кәрәктәре сумочкала, – тип бер бәләкәй генә тоҡсайын өҫкәрәк күтәреп һелкетеп ҡуйҙы апай кеше.
– Беҙгә барабыҙмы, әллә бүтән таныштарығыҙға илтеп ҡалдырайыҡмы? – тип йылмайҙы Рәмилә.
– Бүтән таныштарыбыҙ юҡ шул.
– Уй, әллә нәмә һорап ултырамсы. Бүлмәбеҙ бәләкәс кенә булһа ла, күңелебеҙ ки-и-иң ул, – тип, Рәмилә үҙенең уңайһыҙланыуын йәшерергә тырышып, йәнә бер йылмайҙы.
Бүлмә ишеген асҡан Фаил, ҡунаҡтар күргәс:
– Ә-ә-ә, хуш килдегеҙ, әйҙә, түрҙән уҙығыҙ. Кәләш, сюрприз, тип йәнде ҡытыҡлап ҡуйғайны шул, – тип ҡыуанып киткән булды.
– Әлфинур Мәүлитовна булам. Былар минең ҡыҙҙарым Әүлиә менән Мәүлиә.
– Игеҙәктәрҙең исемдәре матур икән. Өфөнө күрергә килдегеҙме?
– Уҡырға инергә, – тип телгә килде оялсан ҡыҙҙарҙың береһе.
– Ҡайһы уҡыу йортона?
– Әллә инде, һеҙгә ышанып килдек, ҡайҙа алып бараһығыҙ, шунда.
Бындай ҡыйыулыҡты Рәмилә менән Фаил шаяртыу тип ҡабул итте шикелле, бер-береһенә ҡарашып, күҙ ҡыҫышҡан булдылар.
Сәй эсеп алғас, хужалар бүлмәләге берҙән-бер карауатҡа урын йәйеп, ҡунаҡтарҙы ҡалдырҙылар ҙа, үҙҙәре таныштарына йоҡларға киттеләр. Ни хәл итәһең, һиңә күҙ төбәп килгән кешеләрҙе урамға сығарып ебәреп булмай ҙа инде.
Иртәгәһен иртүк, кире ҡайтып, эшкә йыйынып йөрөгәндә, Әлфинур Мәүлитовна:
– Рәмилә балаҡайым, ҡайһы уҡыу йортона алып барып индерһәң дә ризабыҙ. Редакцияла эшләгән кешенең таныштары күп була, – тип тағы күҙҙәрен мөлдөрәтте.
Ябай корректорҙың ниндәй танышы булһын, тип әйтһәң дөрөҫ аңламаҫтар, тип, Фаилы үҙе уҡып йөрөгән институтҡа алып барырға ризалашты. Таныш профессор менән һөйләшеп, Рәмилә уның өс томлыҡ китабын тикшерергә, ә Фаил йәй буйы баҡсаһын ҡарауылларға килешеп, Әүлиә менән Мәүлиәне еңел генә уҡырға индерҙеләр. Был шатлыҡтан Фаил көн оҙоно ҡунаҡтарға баш ҡала буйлап экскурсия ойошторҙо. Рәмиләһе лә, эшенән һорап китеп, кискелеккә оло табын әҙерләне.
Иртәгеһен иртәнсәк быларҙы оҙатабыҙ тип, береһе - уҡыуын, икенсеһе эшен ҡалдырҙы. Бына хушлашыу ваҡыты килеп етте. Ҡунаҡ булғас, ҡунаҡса булһын, тип Фаил, эшләп йөрөгән кешеләй билет алырға аҡсаны үҙе бирҙе. Әлфинур Мәүлитовна уңайһыҙланған төҫ сығарғас, Рәмилә:
– Уның бер нәмәһе лә юҡ, алығыҙ. Һеҙ бит беҙҙең ҡәҙерле ҡунаҡтарыбыҙ, – тип, ҡатындың арҡаһынан һыйпаны.
Шул ваҡыт Әлфинур Мәүлитовна ике ҡыҙын ике яғына етәкләп алды ла, ҡуҙғалырға йыйынған бер автобусҡа йүгереп барып инде лә юғалды. Хатта хушлашып та торманы. Исмаһам тәҙрә аша күрәйек, тип былары улай-былай йүгеренеп ҡаранылар, тик юҡҡа ғына. Етмәһә, ул автобус бөтөнләй икенсе районға, бүтән йүнәлешкә китә булып сыҡты.
– Ул районда һеҙҙең туғандарығыҙ барлығын белмәй инем, – тип һораулы ҡарашын иренә төбәне шул саҡ Рәмилә.
– Дөрөҫөн әйткәндә, туған түгел, таныштарыбыҙ ҙа юҡ. Мин ней һинекеләрҙер тип уйлағайным, – тип ҡапыл туҡтап ҡалды Фаил. –Һөйләшеү-ҡыланыштары ла беҙҙең яҡ кешеләренекенә оҡшамаған шул…
Рәзилә ЫРЫҪҠУЖИНА.