Был йырҙы Артур Хәсәнов сәхнәлә башҡарырға тейеш булған да бит...

"Кейек ҡаҙ юлдары". Построение ваҡытында йырлаған егеттең был йыры шунда уҡ йөрәктәргә үтеп инде лә  йәшен тиҙлегендәй тирә-яҡҡа таралды. Халыҡ уның менән ҡыҙыҡһына башланы. Ҡайҙан? Кем? Артур Хәсәнов атлы Илеш егете була ул. "Шәһри Казан" яҙыуынса, билдәле йырсы Филүс Ҡаһиров: “Артурҙың видеоһын күргәс тә, уны эҙләп таптым. Ул минең яҡташым икән, Башҡортстандан. Артур иҫән-һау әйләнеп ҡайтҡандан һуң, был йырҙы концерттарымда дуэт итеп башҡарасаҡбыҙ. Был хаҡта үҙенә әйттем дә", - тине Филүс. Артур Хәсәнов әлеге ваҡытта Пензала. Ә "Кейек ҡаҙ юлдары" йырын ул үҙе эшләгән  Мәҙәниәт йортоноң миҙгелде асыу концертында йырларға тейеш булған. Тик йырҙы ул сәхнәлә түгел, ә хәрби кейемдә мобилизацияланған егеттәр алдында башҡарҙы. Артурҙың иҫән-һау әйләнеп ҡайтыуын теләйбеҙ! 

Фото: "Шәһри Казан"