Азат Бадранов генерал Шайморатов миҙалы менән бүләкләнде

Башҡортостан Республикаһы хөкүмәтенең беренсе вице-премьеры Азат Бадранов хеҙмәт һәм хәрби бурысын үтәгәндә күрһәткән ҡыйыулығы өсөн генерал Шайморатов миҙалы менән бүләкләнде. Миҙалды бөгөн хөкүмәттең оператив кәңәшмәһендә Башҡортостан Башлығы Радий Хәбиров тапшырҙы, тип хәбәр итә «Башинформ».

— Азат Шамил улына 1-се һанлы миҙал тапшырыла, мин быны махсус рәүештә уның өсөн һаҡланым, — тип билдәләне Радий Хәбиров. — Бер йыл самаһы элек үҙ теләге менән Шайморатов исемендәге батальонға яҙылды. Ул бик яуаплы бурыстар башҡара, мобилизацияланған егеттәребеҙ, батальондарыбыҙ менән бәйләнештә тора.

Азат Бадранов республика Башлығына рәхмәт әйтте:

- Радий Фәрит улы, награда, эшемде, хеҙмәтемде юғары баһалауығыҙ өсөн рәхмәт. Йыл дауамында һеҙҙең менән бәйләнештә булдыҡ, һәр саҡ ярҙам барлығын тойҙоҡ, ҡатмарлы мәсьәләләрҙе хәл иттек. Беҙҙең хәрбиҙәр, доброволецтар бик күп. Егеттәр республикаға күрһәткән ярҙам өсөн оло рәхмәт һүҙҙәрен еткереүҙе һораны.

Азат Бадранов республика етәксеһенә махсус хәрби операция зонаһынан алып ҡайтҡан сувенир — Донбастың бар әрнеүен сағылдырған «Һуғыштан тыныслыҡҡа» скульптураһын тапшырҙы. Ундағы бөтә элементтар ысын, автомат трофейға алынған. Авторы — Донецк оҫтаһы Виктор Михалев. Тиҙҙән Өфөлә уның күргәҙмәһе ойошторола.

https://www.bashinform.ru/news/svo/2023-10-09/azat-badranov-nagrazhden-medalyu-generala-shaymuratova-pod-nomerom-1-3471379