Ял көнө. Ҡыҙҙарыбыҙ менән  ҡала паркына сыҡтыҡ.  Күптән былай бергәләшеп йөрөмәгәс, балаларыбыҙ  ҡыуанып бөтә алмай. Әле бер, әле икенсе атракционда мәж киләләр.

–  Әсәй, тегенеһендә йөрөйөк!

–  Атай, анауына ла барайыҡ!

– Ярай, ярай!

 Шул саҡ ҡаршыбыҙға ҡыҙ бала етәкләгән  Фәниә апай осраны.

– Арыуҙарһығыҙмы әле?

–Һаумыһығыҙ!

Ҡатыным ҡасандыр Фәниә апай менән  бер мәктәптә эшләгән, хәҙер хаҡлы ялда. Ул  ҡатынымды ла, унан ҡыҙҙарыбыҙҙы ҡосағына ҡыҫып-ҡыҫып, дөпөлдәтеп һөйҙө. Әле  ейәнсәрен паркка алып сыҡҡан. Исеме Амелия тине. 

Бер аҙҙан апай  ҡыҙҙарыбыҙҙың  исемдәре һораны. 

–Минең исемем  Алтынай, – тине ғорурлыҡ менән  өлкәне.

–Ә  минеке – Таңсулпан, – тип тәтелдәне бәләкәсе.

–Әләл-ә-ә-ә-л, исемдәрегеҙ ҡалай матур, тәүфиҡле булып үҫегеҙ! Уҡымышлы, мәҙәниәтле кешеләрҙең балалары икәнлеге күренеп тора. Үҙҙәре хас ауылдағы һымаҡ, матур итеп,  беҙҙеңсә һөйләшәләр бит әле.–Унан таныш апай берсә ҡатыныма, берсә миңә  текәлеп торҙо ла  үҙ һығымтаһын сығарҙы.

- Ҡыҙҙарығыҙ бигерәк һылыуҙар бит әле, тфү-тфү, күҙ теймәһен, икегеҙгә лә оҡшамаған.

Ҡапыл да бындай комплиментҡа ни тип әйтергә лә белмәй, икебеҙ ҙә бер тауыштан:

– Рәхмәт! - тинек!

Фото:pediatrinfo.ru