Бөгөн Башҡортостандың халыҡ артисы Ғәлиә Солтановаға — 85 йәш

Артистың репертуары халыҡ йырҙарынан һәм композитор әҫәрҙәренән тора. Ул Советтар Союзы ҡалаларында, сит илдәрҙә сығыш яһай. Сәнғәт белгестәре әйтеүенсә, Ғәлиә Солтанова башҡарыуында “Ашҡаҙар” йыры юғары һөнәри оҫталыҡ өлгөһө булып иҫәпләнә. Ғәлиә Кәлимулла ҡыҙы Башҡорт дәүләт академия драма театрында, сәнғәт институтында, педагогия колледжында, сәнғәт училищеһында эшләй. Ғүмерен сәнғәткә һәм белем биреүгә арнай. Уҡыусылары араһында йырсы, музыкант, дирижер һәм театр артистары бар. 

Ғәлиә Солтанованың йырсы булып китеүендә атаҡлы композитор Хөсәйен Әхмәтовтың хеҙмәте ҙур. Уға артабан уҡыуын дауам итеүҙә, йырсы булараҡ үҫеүҙә ике аралағы ижади дуҫлыҡ ныҡ ярҙам итә. Ғ. Солтанова үҙ сиратында композиторҙың бик күп әҫәрҙәрен беренсе булып халыҡҡа алып сыға.

Ғәлиә Кәлимулла ҡыҙы оҫта педагог та булып таныла. 1980 йылдан башлап Өфө педагогия колледжында, 1988 йылдан алып Өфө дәүләт сәнғәт академияһында студенттарҙы театр, музыка буйынса уҡыта. Тырышлығы, уңғанлығы менән коллегалары, студенттар араһында абруй ҡаҙана.

Оло йәштә булыуға ҡарамаҫтан, Ғәлиә Кәлимулла ҡыҙы бөгөн дә кисәләрҙә, мәҙәни сараларҙа тыуған халҡы өсөн моңло йырҙар башҡара.