Уйҙарым...

Хыялыймы? Хыялыймын шул! Бер һин генә әйтмәнең быны. Хыялый булмаһам, һуҡырҙарса һөйөр инемме ни был Тормошто?!

Минең һуҡмаҡ

Был - минең һуҡмағым. Бер кемдеке лә түгел,т ик үҙемдеке! Һәр яһалған эҙем, аҙымым өсөн тик үҙем яуаплы. Башымды артҡа бороп ҡарай алам да... тик һалған эҙемде юйып, яңырта алмайым. Ҡанундар шулай. Кешелек ҡанундары!
Таҡыр түгел юлым, берсә тау, берсә үҙән буйлап үтә, сәнскәкле, билсәнле, әсе әремле, күрәнле ерҙәр - һәр ҡайһыһын үҙ итәм! Күренмәҫ ерҙән аяҡ табандарымды ярырҙай ҡырлы таштар ҙа, бит-йөҙөмәсә бөркөлөр саң-туҙанлы, итәгемә хәтлем мәсендерер ҡойоло батҡаҡтар аша ла үтергә тура килә. Тура килә...Хоҙай шулай минең өсөн генә тәғәйенләгән Ерҙәр буйынса үҙ Һуҡмағымды - Ғүмер Һуҡмағын һуҙам. Осон әле күрмәйем, башым баҫып атлай бирәм, үҙемсә... Юл сатында уҫал саҡҡан кесерткәнгә лә, йәбешеп һырпаланған дегәнәккә лә иғтибар итмәйем... Яҙмышыма яғылырҙай булғастар, барһындар әйҙә, ҡалырҙар төшөп, үҙ мөҙҙәттәре еткәс...
Был - минең һуҡмаҡ, унда мин хужа, эҙҙәрҙе тик мин һалам... Ҡабатламайым, ҡабатланмайым, ҡанатланып та бармайым, Ерҙән атлайым...

Мин - хыялый!..

Хыялыймы? Хыялыймын шул! Бер һин генә әйтмәнең быны. Хыялый булмаһам, һуҡырҙарса һөйөр инемме ни был Тормошто?! Аяҡ балтырҙарыма матҡып йәбешеп "аҫҡа " һөйрәгәндәрҙе лә, ҡулымдан тотоп "өҫкә " тартҡандарҙы ла берҙәй ЯРАТАМ бит мин! Артымдан бер тотам ҡалмай ыҫылдаған ҡыҫыр йыландай ғәйбәтселәр теленән дә "бал " табам. Үлтереп маҡтағанынан шөрләп боҫам да, кире турайып ҡалҡам, соҡор аша һикергәндәй генә һәр ҡаршылыҡты үтергә күнегеп тә барам шикелле. Хыялый мин, эйе, хыялый! Һәр көнөмдән дә йыр табам, моң табам, мәғәнә табам. Шыҡһыҙ, бер иш түгел улар, хыялыйҙарса һуҡыр мөхәббәт хаҡында... Таңдан кискән ысыҡ тамсыһынан алып, кисен тәҙрәмдән баҡҡан һалҡын йондоҙ - ай хаҡында, мине көн оҙоно уратҡан Ғаләм - Ғаиләм хаҡында был өҙөлмәҫ хыялый йөрәктә урғылған моң. Йәшермәйем, унда һинең хаҡта ла бар бер остоҡ көй, Хыялыйым!

Яғылмаған усаҡ

Яғылмаған усаҡ...Ҡосаҡ-ҡосаҡ утын ташып өйҙөк-өйҙөк тә, икебеҙ ике тарафҡа ҡарап киттек. Кем ҡулында ине икән уталғыс? һиндәме, әллә миндә? Яғылмаған усаҡ...Ә мин һаман ошо усаҡ йылыһын көтөп, хыялыйҙарса "йылынам ". Ҡабынмаҫ инде, утындары ла тырым-тырағай туҙып, серей ҙә башланы, тик күңелгә нисек бойорорға?! Яғылмаған усаҡ... Күптәр көтә ине беҙҙең ҡабыҙырҙы ошо усаҡты, теләктәрен аҡламаныҡ. Бергә барыр һуҡмаҡтарҙы айырып, мәхрүм иттек сауҡалыҡты сихри йылы усаҡтан. Тик шаһит ҡушҡайын ғына моңланмай бит, мин дә, һин дә һағынабыҙ... Йылдар үткән, ҡайтыр юлдар юҡ... Мин һаман да йылынам... яғылмаған усаҡҡа...

Күҙҙәремде сағылдырған " ҡыҫыр нур"

Миҙгелдәр алышына. Ҡып-ҡыҙыл итәкле Ҡыҙһылыуға алмашҡа алтын билле Көҙбикә килә. Аяуһыҙ эҫелеге менән ҡурыштырыр ҡояш нурҙары ла һүрелде, һалҡындар яҡынлай. Мин өшөмәйем, тик шулай ҙа һиҙәм, күрәм, алдымда торған үтә күренмәле "сик " аша барыһын да кисерәм. Өшөмәй тәнем,ас түгелмен дә, әммә ҡанаттарым ирек төҫө күрмәй, көн дә ошо "тыйыулы" кәртә эсендә генә елпенергә мәжбүр. Эх,ел еҫен, үлән-сәскә тәмен татыр мәлдәрендә күҙҙәрен сағылдырған ошо "нурлы урын " ожмахҡа тиңдәй күренә ине лә бит! Яңылыш, ныҡ яңылышты, тик хәҙер һуң! Өс көн тиҙәр ғүмерҙе, күпме генә үтелгәндер ҙә, күпме генә ҡалғандыр. Ҡанаттарҙан ҡойолған ебәк нур остоҡтары аяҡ аҫтына һибелеп юғала, үкенес...

"Бәхетенә сыҙамай сыңлай ", тиҙәр икән минең хаҡта кемдәрҙер. Иламайым, көн яҡтыһында һис ҡасан күҙ йәштәремде сығармайым! Иртә таңдан ысыҡ тамсылары Ерҙе үпкәндә, быялалай үтә күренмәле сигемә йәш тамсыларым тама, Ҡояш нурҙары төшөп бит алмаларымды һөртә, йә шифалы йылы ямғырҙар бирешмәҫкә өндәп һыуға ҡойондороп юя. Мин бирешмәйем, тик ҡанаттар ирек һорай, ә иреккә юл ябыҡ...

Буйһонам,башһынмай ҡасыу уйҙары булманы түгел дә, ҡанатланырҙарым хаҡына келәгә үҙем үрелмәнем.

Мин әҙер барһына, бәхетле киләсәгем хаҡына! Яҙмыштар һис бер иш түгел,яҙылаһы яңы бәхетле яҙмыш хаҡына мин бында ҡалам. Хәҙер үҙ иркемдә ҡалам, киң доньяға һоҡланып мәңге туя алмайым, тоя алмаһам да... Сикләмәгеҙ бер үк бер-берегеҙҙе!

Читайте нас:

Баш мөхәррир: Айгиз Ғиззәт улы Баймөхәмәтов

Телефон

(347)272-61-64

Электрон почта

[email protected]

Адресы

450079, Республика Башкортостан, г. Уфа, ул. 50 летия Октября, 13, каб. 910

Ҡабул итеү бүлмәһе

Венер Айҙар улы Исхаҡов (яуаплы сәркәтип) - 89279443170

Хеҙмәттәшлек

Финзира Ғариф ҡыҙы Рысаева - 89174785622