+14 °С
Ясна
Бөтә яңылыҡтар
Хаттарҙа - яҙмыштар
28 Апрель 2018, 13:16
Билдәһеҙ һалдат
Билдәһеҙ тип исем таҡҡандар!... Билдәһеҙ түгел мин – исемем бар!
Билдәһеҙ тип исем таҡҡандар!...
Билдәһеҙ түгел мин – исемем дә бар!
Иҫкән һуғыш елдәре – минуттар –
Исемде юйып, ҡалдырмағандар.
Ҡалдырыр инем дә яҙып таштарға,
Ҡалдырыр инем дә әйтеп яттарға:
“Мин бар!” тип, тик ул ваҡытта,
Тыуған йорттан бик алыҫта,
Мөһим түгел ине ул исем,
Һалдат ҡына ине һәр кем.
Мөһим түгел ине дошмандарға,
Бары илем тип янғанда алда, артта...
Теге яҡта ла, был яҡта ла
Улар – исемһеҙ ине барыһы ла...
Хәтер тигәнең – аяу икән, онотола.
Онотола булдымы был Кавказда,
Әллә сүлдәй эҫе Афғанда,
Әллә Брянскта ҡола яланда.
Онотола, онотола исемдәр, ваҡиғалар...
Хәтерҙә тик һуңғы алыш, аҙымдар!
Ҡамалдыҡ тигән генә иҫтә,
Йәшәү юҡ тигән уй йөрәктә.
Ҡурҡыу – кемдер ҡастыҡ тине.
Батырлыҡ – кемдер ҡалдыҡ тине.
Кемгә ҡасып, һалдат,
Ҡалдырмаҡсыһың халҡыңды?!
Ҡурҡаҡ, һатлыҡйән тигән исемде
Ҡуш ҡуллап тағырһыңмы?!
Ер тырнап үкерә,
Аяҙ көн күҙгә ҡарап үҙгәрә.
Ҡара болот, ҡара төтөн –
Әйтерһең дә булды был хәл төнөн!
Башта күмәк инек!
Тик... Себеште сүпләгәндәй кисен
Берәүҙә ҡалманы тиерлек,
Ә халыҡ өрккән һарыҡтай,
Бөрөшөп мөйөшкә һырышҡан..
Бер һалдат ҡына үлемдән ҡурҡмай,
Һалдат ҡына ғүмерен һанға һуҡмай...
Ҡан ҡатып тупраҡ әйләнгәндә,
Күренде дошман йәндәре.
Балалар ҡурҡышып илаша,
Дошман түгел, әжәл беҙҙең менән алыша!
Һуңғы тын – һуңғы мөмкинселек –
Илем алдында яуап бирерлек!
Гранаталар... Ынтылдым!
Юҡ итергә дошманды!
Ғәйрәт һәм утҡа ялмандым,
Әжәл генә ҡырҡты юлымды...
Нимә генә булғандыр – белмәйем!
Үҙемде генә һаман эҙләйем:
Ерҙән, күктән, һауанан...
Билдәһеҙ һалдат – юғалған!
Тынлыҡ, тымды илауынан ер,
Дошман да туҡтаны хәҙер-
Халыҡ шатлана,
халыҡ ҡыуана
Рәхмәт уҡып ил батырына.
Был яуҙа ҡалды беҙҙең исем,
Уныһы булһа ла билдәһеҙ...
Һын. Мәңгелек ут яна...
Исемең дә юҡ тиҙәр, һалдат.
Хәтер ҙә юйыла бына,
Ҡайтмайса ярҙарына ҡабат.
Әҙме һуң һинең һымаҡтар,
Тарих битенә яҙылмағандар?!
Әҙме һуң эшләнгән батырлыҡтар
Үҙең менән ҡуша онотолғандар?!
Күп, күптер...
Күпме исемдәрҙе,
Күпме йөҙҙәрҙе
Үҙ эсенә алған
Билдәһеҙ һалдат һәйкәле!...
Мәңгелек ут яна,
Дөрләп һүнмәй яна...
Ҡараһаң ипләп кенә ялҡынын
Күрерһең билдәһеҙ һалдат батырлығын...
Рәхмәт һиңә, билдәһеҙ һалдат!
Рәхмәт һеҙгә, билдәһеҙ һалдаттар!
Читайте нас:
© 2024 «Шоңҡар» - Башҡортостан йәштәренәң ижтимағи-сәйәси, әҙәби-нәфис журналы
Баш мөхәррир: Айгиз Ғиззәт улы Баймөхәмәтов
Телефон
(347)272-61-64
Электрон почта
Адресы
450079, Республика Башкортостан, г. Уфа, ул. 50 летия Октября, 13, каб. 910
Ҡабул итеү бүлмәһе
Венер Айҙар улы Исхаҡов (яуаплы сәркәтип) - 89279443170
Хеҙмәттәшлек
Финзира Ғариф ҡыҙы Рысаева - 89174785622