450 йыллыҡҡа - Көрәш һарайы!

Тантаналы сарала Абхазия Президенты Аслан Бжания, Белоруссия Премьер-министры Роман Головченко, Рәсәй Президентының Волга буйы федераль округындағы тулы хоҡуҡлы вәкиле Игорь Комаров, Башҡортостан Башлығы Радий Хәбиров һәм башҡа абруйлы ҡунаҡтар ҡатнашты.

Ҡотлау һүҙҙәре менән шулай уҡ Беларусь Республикаһы премьер-министры Роман Головченко, Абхазия Президенты Аслан Бжания, Үзбәкстан Республикаһы Наманган өлкәһе Хокимы Шавкат Абдуразаков, Ҡаҙағстандың сәнәғәт һәм төҙөлөш министры Канат Шарлапаев сығыш яһаны.

Роман Головченко легендар өс тапҡыр Олимпия чемпионы Александр Медведь бүләген - ике көрәшсе һүрәтләнгән статуэтканы тапшырҙы. Был музейға спорт объектында мотлаҡ асыласаҡ тәүге экспонат буласаҡ, тип билдәләне Радий Хәбиров.

Хәтерегеҙгә төшөрәбеҙ, 2019 йылдың авгусында төбәк етәксеһе Радий Хәбиров илдең иң ҙур көрәш һарайын төҙөүгә старт бирҙе. Ул абруйлы ҡунаҡтар менән бергә буласаҡ бинаның нигеҙенә киләсәк быуындарға мөрәжәғәт менән ваҡыт капсулаһын һалды.

Бинаның дөйөм майҙаны 28 мең квадрат метр. Ул 3400 тамашасыға иҫәпләнгән амфитеатр менән универсаль залды, 18 келәмгә иҫәпләнгән биш заллы спорт көрәше мәктәбен, спортсылар өсөн ҡунаҡхананы, конференц-залды, медицина-тергеҙеү үҙәген, шулай уҡ спа-комплексты һәм бассейнды үҙ эсенә ала. Шулай итеп, Өфө Көрәш һарайы көс көрәше һәм спорттың башҡа төрҙәре буйынса халыҡ-ара һәм Рәсәй кимәлендәге ярыштар үткәреүгә йүнәлтелгән илдең иң ҙур үҙәктәренең береһе булып тора.

Алдағы көҙ октябрҙә Көрәш һарайында «Рәсәй — спорт державаһы» ХІІ Халыҡ-ара форумы саралары, шул иҫәптән Рәсәй Президенты ҡарамағындағы физик культураны һәм спортты үҫтереү буйынса Совет үткәреләсәк, тип планлаштырыла.

Рәсәй Президенты Владимир Путин Башҡортостан етәкселегенең Өфөлә донъя кимәлендәге объекттар асыу буйынса эшен юғары баһалай. Атап әйткәндә, үҙенең ҡотлауында ул Өфөлә күләмле халыҡ-ара форумдар, абруйлы спорт турнирҙары үткәреү өсөн бөтә шарттар булдырылыуы хаҡында әйтте. Бөгөн асылған яңы Көрәш һарайы октябрҙә «Рәсәй — спорт державаһы» халыҡ-ара спорт форумында ҡатнашыусыларҙы ҡабул итергә әҙер буласаҡ тағы бер объект буласаҡ.

Уникаль комплекс төҙөү проекты буйынса төҙөүселәр шулай уҡ эргә-тирәләге территорияны төҙөкләндерҙе. Бында асыҡ спорт майҙансыҡтары һәм ял итеү зоналары, шулай уҡ автотранспорт өсөн парковкалар, урамдарҙы яҡтыртыу һәм видеокүҙәтеү системалары йыһазландырылды, архитектур яҡтан яҡтыртыу ҡуйылды.