"Беҙ татыулыҡ менән көслөбөҙ"

Мәскәүҙә Рәсәй халыҡтары берҙәмлеге йылына старт биргән  марафон үтте. "Рәсәй - ғаиләләр ғаиләһе" тип аталған йыйында  илдең бөтә төбәктәренән    4 меңдән ашыу кеше ҡатнашты. 

Рәсәй Президенты Владимир Путин, йыйылыусыларға мөрәжәғәт итеп, илдең тарихи сығанаҡтарын аңлауҙың мөһимлеген билдәләне.

 

"Бөтәбеҙҙең дә ҡайҙан барлыҡҡа килеүебеҙҙе, Рәсәйҙең,  халыҡтарыбыҙҙың, шул иҫәптән милләт булараҡ рустарҙың нисек барлыҡҡа килеүен хәтергә төшөрөү артыҡ булмаҫ",   – тине Владимир Владимирович. – Сөнки  бер-береһенән айырым йәшәгән славян этностары нигеҙендә барлыҡҡа килгән, һәм улар уртаҡ территорияһы, уртаҡ иҡтисади мәнфәғәттәре, берҙәм власы һәм берҙәм рухи ҡиммәттәре барлыҡҡа килеү һөҙөмтәһендә берләшкән.  Шулай итеп, даими күп милләтле Рәсәй халҡы барлыҡҡа килгән. Ә иң мөһиме - Рәсәйгә ҡушылған халыҡтарға сикһеҙ ихтирам, уларҙың мәҙәниәтенә,  йолаларына, уларҙың рухи ҡиммәттәренә тулы хөрмәт менән ҡараған.

      Сарала Башҡортостан делегацияһы ла ҡатнашты. Улар араһында журналистар, студенттар, дини хеҙмәткәрҙәр ҙә бар ине. "Еңел булмаған осорҙа йәшәйбеҙ.  Дошманыбыҙ Рәсәйҙе, беҙҙе көсһөҙләндерергә теләй. Әммә Рәсәй бер ҡасан да көсһөҙ булмаясаҡ, сөнки беҙ бар, беҙ берҙәм, беҙ татыу. Төрлө костюмдар кейгән кешеләргә ҡарағыҙ, кешеләр бер идея менән берләшкән. Был илдең көсө – халыҡтарҙың дуҫлығында, күп төрлөлөгөнә хөрмәт менән ҡарауын иҫкә төшөрә. Был сара Халыҡтар берҙәмлеге йылының матур башланғысы, – тип билдәләне "Бөтә донъя башҡорттары ҡоролтайы" башҡарма комитеты ағзаһы, Башҡортостан Республикаһы телерадиокомпанияһы акционерҙар йәмғиәтенең оператив контент редакцияһы мөхәррире Ильяс Батыргәрәев.

 

Формуда дәүләт эшмәкәрҙәре, Рәсәй Геройҙары, күренекле спортсылар, сәнғәт өлкәһе вәкилдәренең күргәҙмәләре ойошторолдо, лекциялар уҡылды.  Шулай уҡ ҡунаҡтар танылған эксперттар етәкселегендә ижади, спорт һәм аш-һыу оҫталығы дәрестәрендә ҡатнашты. Марафонда тәбиғәт, мәҙәниәт, Алтай, Рус Төньяғы, Камчатканың тарихы тураһында документаль фильмдар күрһәтелде. Халыҡ әҙәбиәте китапханаһы ҙур популярлыҡ менән файҙаланды, унда Рәсәй халыҡтары яҙыусыларының рус телендә 3000-дән ашыу китабы тәҡдим ителде.   "Рәсәйҙең гастроль картаһы" проектының ашнаҡсылар командаһы йәштәрҙе Рәсәй халыҡтарының аш-һыу  традициялары менән таныштырҙы.

 

Проекттың маҡсаты – күп милләтле Рәсәйҙең бай мәҙәни мираҫы аша төрлө халыҡтарҙың үҙ-ара татыулығын, бер-береһенә хөрмәтен күрһәтеү ине.