Мәрйәм Бураҡаеванан буҙа рецебы

Бөгөн һеҙҙең иғтибарға абруйлы ағинәй, яҙыусы, йәмәғәт эшмәкәре Мәрйәм Бураҡаеваның рецебын тәҡдим итәбеҙ:

 

– Мин был шифалы эсемлекте 200 грамлыҡ буҙа ҡатнашмаһынан яһайым. Унда төп компонент - һоло, шулай уҡ арыш, ваҡ талҡан, тананың эске майы ҡатнаштырылған. Уны “Буҙа ҡатнашмаһы” тип атайбыҙ һәм заказ буйынса ғына цехта эшләткәс, такси менән оҙатабыҙ.

 

Әле 200 грамлыҡ буҙа ҡатнашмаһы өс литрға иҫәпләнгән. Аҙаҡ, әсеп сыҡҡас, ҡайнап һыуынған һыуға шәкәр татытып (сәйгә һалған сама менән) шыйыҡлатырға мөмкин.

 

Эш барышы: буҙа ҡайната торған кәстрүлгә (дүрт-биш литрлыҡ булһын, ташып китеүе ихтимал) бер ҡап ҡатнашманы тотош һалығыҙ. Шунан ярты литр самаһы һалҡын һыу ҡойоп, ентекләп бутағыҙ. Бер төйөрө лә ҡалмаһын. Быныһын ултыртып ҡуйығыҙ ҙа, икенсе һауыт алып, ике литрҙан ашыуыраҡ (йәмғеһе 2,5-3 литр тинек бит инде) һыуҙы айырым ҡайнатығыҙ. Бының буҙа сифаты өсөн әһәмиәте юҡ. Фәҡәт эште тиҙләтә һәм еңеләйтә. Айырым ҡайнатып сығарғас, кәстрүлгә, теге болғатып ултыртҡан ҡатнашма өҫтөнә ҡойоп, ентекләп болғатаһың да талғын ғына утта 40 минут буйы бешерәһең. Төбөнә ултырмаһын өсөн даими болғап алырға кәрәк. 40 минут ҡайнағас, һыуытырға ҡуяһың. Бүлмә температураһына етеп һыуынғас, ике аш ҡалағы шәкәр һәм әсетке һалып, өҫтөн матурлап ябып ултыртаһың.

 

Әсетке һәм әсеү. Әсетке булараҡ стакан ярым тирәһе ҡымыҙ йәки электән алып ҡалынған 500 грамм самаһы буҙаны ҡулланығыҙ. Сөпрә ярамай, ундай буҙаның шифаһы булмай. Әсетеү өсөн ҡулланылған ҡымыҙ йәки буҙа йылы – бүлмә температураһында булһын. Шифаһын күрегеҙ!