Холестерин кимәле күпме булырға тейеш?

Бигерәк тә гүзәл зат вәкилдәре үҙенең холестерин кимәле тураһында яҡшы белергә тейеш, сөнки, ир-егеттәр менән сағыштырғанда, тап уларға холестериндың күтәрелеүе янай.

20 йәше тулып уҙған ҡатындарҙың яҡынса 45 процентының холестерин кимәле 5 ммоль/л йәки унан юғарыраҡ була. Был иһә саманан тыш тип һанала. Шул уҡ ваҡытта холестерин менән бергә үлсәнгән триглициридтар, ҡандағы май төрө, ир-егеттәр менән сағыштырғанда, гүзәл зат вәкилдәре өсөн хәүефлерәк. Ә уның юғары кимәлдә булыуы йөрәк сирҙәренә, инсультҡа илтә, шуға үҙеңдең холестерин кимәлен белеү мотлаҡ.

Ашаған аҙыҡ-түлектә калория күберәк икән, уларҙың артығы организмда триглициридтарға, ә улар май күҙәнәктәренә әйләнә. Триглициридтар организмға энергия алыу өсөн кәрәк булһа ла, уның артығы сәләмәтлек өсөн хәүеф янай. Был – йөрәк-ҡан тамырҙары, шәкәр диабеты сирҙәре, һимеҙлек һәм башҡалар.

Йәш буйынса холестерин нормаһы:

Йәш    Дөйөм            "Насар"          "Яҡшы"

            (ммоль/л)       (ммоль/л)       (ммоль/л)

20-30   3,16-5,75        1,48-4,25        0,85-2,15

30-35   3,37-6,27        1,81-4,45        0,93-2,12

40-50   3,81-6,86        1,92-4,82        0,88-2,25

50-60   4,20-7,77        2,28-5,44        0,96-2,35

60-70   4,45-7,85        2,59-5,72        0,98-2,48

70+      4,48-7,25        2,49-5,34        0,85-2,38

Айһылыу НИЗАМОВА

Фото:poleznii-site.ru