Дрон менән идара итергә өйрәтә

Башҡортостандан «Сыуаш» позывнойлы яугир махсус хәрби операцияла ҡатнашыусы пилотһыҙ осоу аппараттары (БПЛА) менән эшләүҙән тыш, хеҙмәттәштәре өсөн остаз да, уларға был талап ителгән оҫталыҡты үҙләштерергә ярҙам итә.

Был хаҡта «Башҡорт батальоны» телеграм-каналы хәбәр итә. “Сыуаш” 2024 йылда РФ Оборона министрлығы менән контракт төҙөгән. Махсус хәрби операция зонаһында Ватанды яҡлау ҡарарын йәш ир армия сафында хеҙмәт үткәндә үк ҡабул иткән.

Интенсив әҙерлек үткәндән һуң яугир үҙен фронтта дрон менән идара итеү буйынса иң яҡшы белгестәрҙең береһе булараҡ күрһәткән. Әлеге ваҡытта ул урындарҙы разведкалау, дошман хәрәкәттәрен күҙәтеү һәм дошман көстәренә төбәп һөжүм яһау буйынса хәрби бурыстар үтәй.

«Сыуаш» билдәләүенсә, пилотһыҙ осоу аппараттарын ҡулланыу һуғыш алып барыуҙың һөҙөмтәлелеген дә, шәхси составтың хәүефһеҙлеген дә арттырырға мөмкинлек бирә.  

Хәрби бурыстарҙы үтәүгә индергән өлөшө өсөн яугир грамоталар менән билдәләнгән һәм хәрби хәрәкәттәр ветераны статусына лайыҡ булған.

Әйтергә кәрәк, 2026 йылда БПЛА (пилотһыҙ осоу аппараттары) операторы булып хеҙмәт итеү МХО зонаһында иң хәүефһеҙ һәм перспективалы хәрби һөнәрҙәрҙең береһе тип һанала, сөнки разведка алып барырға һәм дошмандан алыҫта хәрби бурыстар үтәү мөмкинлеген бирә. Армияның дистанцион эшләгән "күҙҙәре һәм ҡулдары" операторҙары юғары эш хаҡы ала.

Фото:  "Башҡорт батальоны" төркөмө.