Үҙенсәлекле күргәҙмәгә рәхим итегеҙ!

Бөгөн, 13 сентябрҙә,  М.В .Нестеров исемендәге Башҡорт дәүләт художество музейы М.В.Ломоносов исемендәге Мәскәү дәүләт университетының сәнғәт факультеты, Башҡортостан Республикаһының мәҙәниәт министрлығы, Санкт Петербургтағы художество академияһының ғилми-тикшеренеү музейы ярҙамында рәссам Евгения Васильеваның (EVA) “Ваҡыт һәм мәңгелек” күргәҙмәһе асылды. Унда ваҡыт һәм мәңгелек, уларҙың кеше тормошондағы, ижадындағы, рухи донъяһындағы роле сағыла. Авторҙың шәхси күңел кисерештәре тураһындағы күргәҙмәһе 13 ноябргә тиклем дауам итәсәк.

 Күргәҙмә билдәле һынлы сәнғәт академигы, РСФСР-ҙың атҡаҙанған сәнғәт эшмәкәре, Өфөлә художество музейына нигеҙ һалыусы Михаил Васильевич Нестеровтың (1862-1942) тыуыуына 160 йыл тулыуға арналған.

“Сәнғәт донъяны яҡшыраҡ итергә, ысынбарлыҡты аңларға һәм мәңгелек ҡиммәттәр тураһында уйланырға ярҙам итә. Ул беҙгә христиан ҡиммәттәре артынан барырға һәм Ерҙәге төп тәғәйенләнешебеҙ тураһында хәтерләргә булышлыҡ итә”, - тине Евгения Васильева күргәҙмә асылыуы алдынан.

Асыу сараһында шулай уҡ БР Мәҙәниәт министры Әминә Шафиҡова,  Юғары мөфтөй, Рәсәй мосолмандары Үҙәк диниә назараты рәйесе Тәлғәт Тажетдин, скульптор Салауат Щербаков ҡатнашты.

Евгения Васильева 10 картинаһын - М.В.Нестеров исемендәге Башҡорт дәүләт художество музейы фондына, 3 картинаһын Рәсәй мосолмандары Үҙәк диниә назаратына бүләк итте.