Башҡорт драма театры артистары Мәскәүҙә үҙ спектаклдәрен күрһәтәсәк

"Беҙҙең спектаклдәргә Мәскәүҙәр ҙә эркелеп килер тип ышанабыҙ".

Башҡорт драма театры артистары Мәскәүҙә үҙ спектаклдәрен күрһәтәсәк. Спектакелдәр 15 һәм 16 майҙа "Модерн" театры сәхнәһендә күрһәтелә.

Мәскәүҙә йәшәгән яҡташтарға М.Ғафури исемендәге Башҡорт дәүләт академия драма театрының баш режиссеры Айрат Абушахманов ҡуйған ике популяр спектакль тәҡдим ителәсәк. Тәүге көндә Хәлисә Мөҙәрисованың «Бәхет хаҡы» повесы буйынса музыкаль мелодрама күрһәтелә. Төп ролдә - Рәсәйҙең, Башҡортостандың һәм Татарстандың халыҡ артисы Фидан Ғафаров.

"Был миҙгелдә беҙ Фидан Сафа улының 75 йәшлек юбилейын билдәләнек, - тип билдәләне театр директоры Иршат Фәйзуллин. - Һәм был спектакль күренекле актерыбыҙҙың юбилей саралары сиктәрендә Мәскәүҙә күрһәтеләсәк. Спектакль бына инде 10 йылдан ашыу сәхнәлә күрһәтелеүгә ҡарамаҫтан, ул үҙенең актуаллеген юғалтмаған. Мелодрамала Фидан Ғафаров һәм башҡа актерҙар башҡарыуында йырҙар күп. «Бәхет хаҡы» Мәскәүҙә лә үҙ тамашасыһын табыр тип ышанабыҙ».

16 майҙа Башҡорт драма театры мәскәүҙәрҙе уҙған ижад миҙгелендәге иң сағыу премьераларҙың береһенә - «Һинһеҙ килгән яҙҙар» мелодрамаһына саҡыра.

Фото: https://bashdram.ru/afisha/vesna-bez-tebya-8/