"Уның менән нисек йәшәйһең ул?!”

Мәжит Ғафури исемендәге Башҡорт дәүләт академия драма театры 4 октябрҙә 104-се миҙгелен асты. Тамашасыларға Заһиҙә Мусинаның повесы буйынса «Килен» спектакле (реж. - Ф. Ғарипов) тәҡдим ителде.

Төп ролдәрҙең береһен, Аҡйондоҙҙоң ирен - Булатты,  - Морат Рафиҡов башҡара.

Морат Рафиҡов сығышы менән Хәйбулла районының Мәмбәт ауылынан. 2014 йылда З.Исмәғилев исемендәге Өфө дәүләт сәнғәт академияһын (институт) тамамлай, шул уҡ йылда М.Ғафури исемендәге Башҡорт дәүләт академия драма театры труппаһына ҡабул ителә. 

 "Әйткәндәй, һин түгел, ә роль үҙе һине көтөп ала тиеүҙәре дөп-дөрөҫтөр. Сөнки Морат ҡустыны тап ошо Булат роле асылын асты, күҙ йәштәрен күрһәтергә яратмаған ир-егетте илатты",  - ти был роль тураһында Башҡортостандың халыҡ артисы Сәғиҙулла Байегет. 

Морат Рафиҡов та "Килен" спектаклендәге роле тураһындағы уй-фекерҙәре менән уртаҡлашты: 

- Был роль миңә ауыр бирелде. Булаттың яҙмышы, уның кисерештәре — минең тормошҡа ҡапма-ҡаршы. Эш барышында ошондай проблеманы күтәргән  уҡылмаған материалдар, ҡаралмаған документаль һәм нәфис фильмдар ҡалманы. Оҡшаш яҙмышлы ир-егеттәр менән дә осраштым. Уларҙың һөйләгәндәрен тыңлап, күңел кисерештәрен аңларға тырыштым. Ҡыҙғанысҡа ҡаршы, бындай проблема беҙҙең һәр бер ауылда тиерлек осрай, “һаҙлыҡ”ҡа батҡан ир-аттарҙың күп булыуы әсендерә. Осрашыуҙарҙан ауыр тойғолар менән ҡайттым.

Спектакль барышында тамашасыларҙың минең геройға ҡарата нәфрәте һиҙелде. Мин үҙем дә геройға ҡарата шундайыраҡ тойғолар кисерҙем. Ролде яратып башҡарһам да, Булаттың ҡайһы бер ҡылыҡтары башыма һыймай, уға ҡарата һорауҙарым әле лә күп. Яуаптар һаман эҙләйем. Спектаклдән һуң  кәләшемдән хатта: “Уның менән нисек йәшәйһең ул?!” -  тип һорап ҡуйғандар.

Тағы әйтеп үтергә кәрәк, Минең менән был спектаклдә ҡыҙым да уйнаны. Уның роле — бәләкәй Сулпан. Был Миленаның ҙур сәхнәлә тәүге сығышы.

Фото: Руслан Юлтаев.