Айҙар Ғәлимовты бер ҡыҙ юллап килгән

"Беҙ Зилә менән Өфө автотранспорт техникумында бергә уҡыныҡ. Үҙешмәкәр сәнғәткә ҙур иғтибар бирелә ине беҙҙә – мин инде, әлбиттә, сәхнәнән төшмәйем. Зилә лә йырға мөкиббән киткән кеше – бер байрамда ойошторолған концертта сәхнәгә ул да сыҡты. Шулай таныштык... Унан һуң «автомотопробег»ҡа сығып киттек (ул саҡта әле гастрольдең ни икәнен белмәйбеҙ!): төрлө ерҙәргә барып, техникум тураһында һөйләйбеҙ,  үҙебеҙгә уҡырға саҡырабыҙ. Шул саҡта Зилә  меннә тағы ла яҡынайҙыҡ.
Ул мине армияға оҙатып ҡалды. Ә  һуңынан, күрергә тип, яныма килде! Литваға ҡәҙәр! Балтик буйы ул саҡта ла  барыбер сит ил кеүек ине бит. Уның килерен белмәй инем, әлбиттә.  Өйрәнеүҙәр ваҡыты ине. Бер лейтенант: «А ты знаешь, что к тебе девушка приехала?» – ти. Ышанманым! Булмаҫ тим! Бергә үткәргән һәр миҙгеле иҫтә ул саҡтың... Армиянан ҡайтҡас, оҙаҡ осрашып йөрмәнек инде, өйләнештек."

"Тамаша" журналынан