Йондоҙҙар бер сәхнәлә!

“ЮлдашХит” музыка фестивале егерме йылға яҡын республикала башҡорт эстрадаһының көҙгөһө булып тора. Йылдан- йыл үҫешкән һәм киңәйгән сарала бер нисә йыл рәттән Рәсәй ҡалаларынан һәм өлкәләренән ҡатнашыусылар күбәйҙе, ә былтыр ул халыҡ-ара кимәлгә сыҡты - Ҡытайҙан һәм Ҡаҙағстандан килгән йырсылар башҡорт телендә тамашасы күңелен яулар йырҙар башҡарҙы. Быйыл фестивалдә халыҡ йырынан башлап яһалма интеллект ижад итеп башҡарған йырғаса ишетергә мөмкин була. «Юлдаш» радиоһы коллективы бар күңелен һалып ойошторған йыр-моң байрамында йыл дауамында эшләгән композиторҙар, шағирҙар, аранжировщиктар, музыканттар билдәләнә, «Легенда» номинацияһында республика йыр сәнғәтенә ҙур өлөш индергән өлкән быуын йырсылары бүләкләнә, «Йыл асышы» номинацияһында эстрадаға балҡып килеп керер яңы исемдәр асыла. Быйыл заман менән бергә атларға тырышыусы коллектив яңы номинация индереп, мәҙәниәт үҫешенә ярҙам итеүселәрҙе лә билдәләй. Өсөнсө йыл рәттән “Юлдаштың халыҡ йырсыһы” миҙалына лайыҡ һәләтле, моңло йырсыларҙы радиотыңлаусылар һайлай. Р.Шаһыбалов,И. Ғәзизов, Р.Зарипов, И.Нурғәлин, Г.Асаева был миҙалды алыусылар рәтендә. Быйыл тыңлаусылар «Юлдаш»тың юғары наградаһын Ян Лира йә Ирек Ноғомановҡа тапшырыу өсөн тауыш бирә, еңеүсе 29 ноябрҙә тамаша залында билдәле буласаҡ .
Йыл дауамында барған хит парад еңеүселәрен дә тыңлаусылар һайлай, шуға ла 28, 29 ноябрҙә «Башҡортостан» дәүләт концерт залында уҙасаҡ ҙур концертты радионың үҙе һымаҡ “халыҡсан” тип әйтергә мөмкин. Был эстәлекле тамаша - йыл йомғаҡтары, күренекле һәм күрмәлекле сәхнә йондоҙҙары бер урында йыйылған сағыу сәхнә, йыл дауамында һәр көндө халыҡ менән бергә башлаған Теге өсәү, бүләкле уйын-бәйгеләр, йор һүҙ, рәхмәтле була белгән дәртле тамашасы ла. 365 көн эфир тулҡындарында һәм бер тапҡыр башҡаланың ҙур концерт залында беҙ бергә!