Башдрамда премьера көтөлә!

Мәжит Ғафури исемендәге Башҡорт дәүләт академия драма театрында Антон Чеховтың «Ваня ағай» пьесаһы буйынса премьера көтөлә. Ошо премьера алдынан театр журналистар менән осрашыу үткәрҙе.

Пресс-конференцияла театрҙың директоры Иршат Фәйзуллин, баш режиссеры Айрат Абушахманов, Санкт-Петербург режиссеры Степан Пектеев, спектаклдә уйнаясаҡ актерҙар — Азат Вәлитов, Милена Сираева, Эльвира Юнысова ҡатнашты.

Степан Пектеев ҡуйған әҫәр “кешенең йәшәү парадоксын” тикшерә: геройҙар көндәлек мәшәҡәттәргә сумып, яҙмыштарының мөһим боролоштарын күҙҙән ысҡындыра.

— Чехов – ул билдәле бер мәлдә генә килеп етә торған юғары нөктә. Ул кешенең тормош һынылыштары ваҡытында ҡапыл үткәндәренә күҙ һалыуын һәм иң ҙур хыялы – бер иртәлә барыһын да яңынан башлау теләге барлығын күрһәтә. Был мөмкинме икән һуң?.. Әллә ваҡыт беҙҙе тормошҡа ашмаған өмөттәр әсирлегендә ҡалдырып, кире ҡайта алмаҫлыҡ үтеп китәме? — ти Степан Пектеев.

«Ваня ағай» был сәхнәләштереүҙә (ҡуйыусы рәссам — Катерина Андреева, композиторы — Евгений Роднянский) психологик театр традицияларына тоғро ҡала, әммә көтөлмәгәнсә заманса яңғырай – тамашасыны ваҡыт, юғалған өмөттәр һәм кешелек йәшәйешенең мәңгелек һорауҙары тураһында уйланырға саҡыра.

Премьера 13-14 мартта уҙасаҡ. Спектакль башҡорт телендә уйнала.

Фото: https://vk.com/bashdram