Аллаһу Тәғәлә беҙҙе шундай хәлгә төшөүҙән һаҡлаһын!

Ғаилә ағзалары, киске аш ашау өсөн, өҫтәл артына йыйылған. Оло улдары күрше ҡыҙына өйләнергә теләгәнен хәбәр итте.

       Аталары ризаһыҙлығын белгертеп:
    — Уның атаһы фәҡирлектә йәшәне. Шуға күрә ҡыҙына  бер нәмә ҡалдыра  алманы, — тип әйтте.
Әсәләре иһә ҡушылып:
    — Ул бит аҡса тота белмәй. Бөтөн эшләгән аҡсаһын бик тиҙ туҙҙырып бөтөрә, – тине.
Һүҙгә бәләкәй улдары ла ҡушылды:
    — Ул бит футбол хаҡында ла бер нәмә  белмәй.
Һүҙгә оло ҡыҙы ла ҡушылып китте:
— Һеҙ уның битен күргәнегеҙ бармы?Уның бите һипкелдәр менән тулған.
        Кейәүҙәре лә үҙенең һүҙен әйтте:
    — Уның бөтөн белгәне – телевизор ҡарау.
        Өләсәләре лә ҡалтырана-ҡалтырана:
   — Ул бит төҫөн килтереп кейенә лә белмәй, — тип әйтеп ҡуйҙы.
   — Һеҙ уның килешмәгән күҙлек кейеп йөрөүен күргәнегеҙ юҡтыр әле, — тип ҡартаталары ла һүҙгә ҡушылды.
      Бөтә тәнҡиттәрҙе тыныс ҡына тыңлап  ултырған  оло улдары:
   — Эйе, шулайҙыр. Әммә ләкин уның берегеҙҙә лә булмаған бер өҫтөнлөгө бар, — тип әйткәс, бөтөн ғаилә бер тауыштан:
  — Ниндәй өҫтөнлөгө? — тип һораны.
  — Уның һеҙҙең кеүек туғандары юҡ, —тип яуап ҡайтарҙы улдары.
       Хөрмәтле дуҫтарым, кешенең кәмселеген күрә белеү – ғорурлыҡ түгел. Киреһенсә, кешенең яҡшы яғын күреп, ыңғай баһа бирә белеү — ысын ғорурлыҡ.

         Тормошта шуны күҙәтеп була: үҙҙәре кәмселектәр соҡорона төшөп батҡан уҫал һәм насар
кешеләр башҡаларҙағы яҡшы сифатты күрә алмайҙар. Аллаһу Тәғәлә беҙҙе шундай хәлгә төшөүҙән һаҡлаһын.

Фото: proprikol.ru