Мәктәп директорҙарына - грант

Һуңғы йылдарҙа Башҡортостан белем биреү кимәлен үҫтереүҙә юғары бурыстар ҡуя, тип билдәләне Башҡортостан Башлығы Радий Хәбиров Дәүләт Йыйылышы – Ҡоролтайға Мөрәжәғәтнамәһендә.

Уҡытыусылар һәм тәрбиәселәр өсөн бер нисә ярҙам сараһы булдырылған. Мәҫәлән, быйыл иң яҡшы тәрбиәселәргә 575 мең һум күләмендә 75 грант бирелгән. Киләһе йылдан иң уңышлы йәш мәктәп етәкселәре өсөн (45 йәшкә тиклем) 690-ар мең һумлыҡ 50-шәр грант булдырыласаҡ. Йыл һайын кәмендә мең педагог шифаханала ял итеү өсөн 56 мең һумлыҡ сертификат аласаҡ. Радий Хәбиров был ярҙам сараһы уҡытыусыларҙың һорауы буйынса булдырылыуын билдәләне.

Капиталь төҙөкләндереү федераль программаһы буйынса 146 мәктәп бинаһы төҙөкләндерелгән. Тағы бер федераль программаға 16 мәктәпкәсә учреждение корпусын һәм 7 колледжды ремонтлау индерелгән. Бынан тыш, 215 спорт залы һәм асыҡ һауалағы 25 спорт майҙансығы төҙөкләндерелгән. Төбәк бюджеты иҫәбенә Евразия ғилми-тикшеренеү үҙәге университеттары менән берлектә 15 предуниверсарий булдырылған, 265 мәктәп уҡыусыһының проекты тормошҡа ашырылған.

Һуңғы биш йылда республикала 31 мең урынлыҡ 44 яңы мәктәп һәм 65 балалар баҡсаһы төҙөлгән, быйыл иһә тағы ла 4 мәктәп асылған. 2025 йылда Нуғай ҡасабаһында 260 урынлыҡ балалар баҡсаһы төҙөлә башлаясаҡ. Өфөлә иһә федераль ҡаҙна иҫәбенә математика мәктәп-интернаты төҙөләсәк.

– Бөтә республиканан йыйылған һәләтле балалар өсөн заманса үҙәк булдырасаҡбыҙ. Был үҙенсәлекле мәктәп буласаҡ, уны тамамлаусылар менән илебеҙ ғорурланыр, — тип билдәләне Башҡортостан Башлығы.

2022 йылдан республика «Профессионализм» федераль проектында әүҙем ҡатнаша. Әлеге ваҡытта 14 белем биреү һәм белем биреү-етештереү кластеры эшләй. Башҡортостан Башлығы Мәғариф һәм фән министрлығына киләһе йылда биш яңы кластер булдырыуға ғариза әҙерләргә ҡушты.

Балалар менән уңышлы эшләү миҫалы итеп Радий Хәбиров Өфөнөң 18-се балалар баҡсаһы тәрбиәсеһе, «Иң яҡшы туған тел һәм туған әҙәбиәт уҡытыусыһы – 2024» Бөтә Рәсәй конкурсында еңеү яулаған Әлиә Ишдәүләтованы килтерҙе.

Быйыл Башҡортостан мәктәп уҡыусылары араһында үткәрелгән интеллектуаль олимпиада һөҙөмтәләре буйынса Волга буйы федераль округының тәүге өс лидеры иҫәбенә инде. Сағыштырыу өсөн: 2023 йылда республика 14-се урында ине. Бөтә Рәсәй мәктәп олимпиадаһында еңеүселәр һәм призерҙар һаны буйынса ла төбәк алтынсы урынға күтәрелде. Уның еңеүселәре һәм призерҙар, шулай уҡ уларҙы әҙерләгән уҡытыусылар өсөн стипендия һәм премия күләме 300 мең һәм 150 мең һумға тиклем арттырылған.

Бындай стипендия  алыусылар араһында Өфөнөң 93-сө физика-математика лицейы студенты Дмитрий Вылубков та бар. Быйыл март айында Рәсәй йыйылма командаһы составында беренсе Халыҡ-ара математика олимпиадаһында алтын миҙал яулап, хәҙер МИПТ физика-технология институтында уңышлы белем ала. Уҡытыусыһы Айҙар Миңниәхмәтов быйыл математиканан БДИ-ла 100 балл йыйған дүрт уҡыусы әҙерләгән. Йыл һайын уның уҡыусылары предмет олимпиадаларында еңеүсе һәм призер була.

Автор: Ләйсән Закирова.

https://www.bashinform.ru