Бөгөн Сәлих ауылында "Айыҡ ауыл" республика конкурсы сиктәрендә "Наҡаҫ" мәҙәни-ял паркы асылды. Уның эсендә Бөйөк Ватан һуғышына бағышланған обелиск, балалар һәм спорт майҙансығы, ғашиҡтар ултырғысы урын алған. Тантаналы сарала медицина фәндәре докторы, профессор, Рәсәй Федерацияһының 5-се һәм 6-сы саҡырылыш Дәүләт думаһы депутаты, Бөтә донъя башҡорттары ҡоролтайы президиумы ағзаһы Сәлиә Мырҙабаева, шашка буйынса күп тапҡыр донъя, Европа һәм Рәсәй чемпионы, Башҡортостан Республикаһы Дәүләт Йыйылышы -Ҡоролтайы рәйесенең урынбаҫары Тамара Танһыҡҡужина, Күгәрсен районы хакимиәте башлығы вазифаһын ваҡытлыса башҡарыусы Азамат Сәйфуллин ҡатнашты. Улар сәлихтарға әүҙемлектәре өсөн рәхмәт белдерҙе һәм конкурста еңеүҙәрен теләне.