БУЛҒАН ҺӘМ БУЛЫУЫ ИХТИМАЛ ХӘЛДӘР

РАИЛ БАЙБУЛАТОВ

Бының идара рәйесе Рауил Бикбаевтың урынбаҫары сағы, Яҙыусыларҙың дөйөм йыйылышын алып бара.

– Считаю открытым общее собрание СП РБ, – тип башлай, "СП РБ" беҙҙең телдә "Союз писателей Республики Башкортостан" тигәнде аңлата.
Аҙаҡтан бер йәш яҙыусы Байбулатов янына килә: "Ағай "СП РБ" тигәне нимә була ул?"

– Ул, ҡустым, "Союз писателей Раиля Байбулатова" тигән һүҙ була.
Рауил Бикбаев быны ишетеп ҡала:

– Нимә?!

– Әй, ғәфү! "Союз писателей Равиля Бикбаева" икән...

РОБЕРТ БАЙЫМОВ

– Роберт Нурмөхәмәтович, Һеҙ ниңә хәҙер әҫәр яҙмайһығыҙ?

– Лауреат булдым бит инде.

РАУИЛ БИКБАЕВ

Булған һөйләшеү. Бер көн быға шылтыраттым: "Хәлдәр нисек?"
– Ағай, илап ултырам әле. – "Кәйефе шәп" саҡтарҙа ул миңә шулай "ағай" тип ысҡындыра.

– Ниҙәр булды, мырҙам?

– Бына пенсия килтерҙеләр.

РИФ ТОЙҒОНОВ

Булыр-булмаҫ. Бер ара идара рәйесе урынбаҫары Риф Тойғонов та, һис кенә килешмәһә лә, һаҡал-мыйыҡ үҫтереп алды. Һорайһы иттем:

– Мырҙам, ниңә һаҡал ебәрергә булдың әле?

– Ағай, оло ғына йәштәһең, шуны ла аңламайһың – быйыл Рауил Төхвәтовичҡа 60 тула ла инде...

Бер аҙҙан ҡарайым: теге һирәк кенә терпе йөндәрен ҡырып ырғытҡан. – Ниңә ҡырырға булдың һаҡалыңды?

– Эш сыҡмаҫҡа оҡшаған, рәйеслектә үҙем ҡалам, ти...

БУЛАТ РАФИҠОВ

Президент Борис Ельцин наградаға ебәрелгән документтарҙы ҡарап ултыра. Динис Бүләковтың Булат Рафиҡовҡа 60 йәш тулыу уңайы менән ебәргән ҡағыҙҙарын ала:

– А, Булат Рафиков! Помню, помню его... В Уфе встречались. Что, орден Ленина? Ну, Динис Мударисович, даешь. Я же орден Ленина ликвидировал. Булат Рафиков очень любит татар – женился татарке, очень любит русских – дочь выдал за русского. Орден "Дружбы народов" ему, понима-ешь!

НАЗАР НӘЖМИ

Ейәне Айсар:

– Ҡарт әти, син Башкортостанның халык шагыйрымы, әллә Татарстанның халык шагыйрымы?

– Улыкайым, мин Казанда чакта – Татарстанның халык шагыйре, Өфөлә

саҡта – Башҡортостандың халыҡ шағиры.

– Ә Мәскәүдә?

– В Москве я – Назар Наджми.

САФУАН ӘЛИБАЙ

Башлыҡ булған һәр зат та дәүләт тарафынан беркетелгән еңел машинаны – үҙенеке, шоферын кинйә ҡустыһы итеп күрә башлай. Рауил Бикбаевтан күрмәксе, "Ағиҙел" журналының баш мөхәррире Сафуан Әлибай ҙа машинаһын аҫтынан төшөрмәй – иҫке булһа ла, "Волга" бит әле, етмәһә, ҡап-ҡара төҫтә.

Былтыр Сафуан Әлибай Төркиәгә китте. Урынбаҫары Рәмил Йәнбәк, мин дә бер кинәнеп ултырып йөрөйөм әле, тиһә, ҡара "Волга" юҡ – Сафуан, тегене самолетҡа тағып, Төркиәгә алған да киткән. Тик изгелеген күрә алмаған – Истамбулға барып етеү менән, бының ҡара "Волга"һын пресҡа һалып ҡыҫҡан да ҡуйғандар.

Төркиәлә металлолом бик ҡәҙерле икән.

* * *
БУЛЫР-БУЛМАҪ

80-се йылдарҙа Башҡортостанға ике монгол яҙыусыһы килде. Уларҙы райондар буйлап оҙатып йөрөү эшен Сафуан Әлибайға йөкмәттеләр.
...Иртәгеһенә райкомдан КГБ-ға шылтыраталар:

– Монгол яҙыусылары икәү, тигәйнегеҙ, өсәү булып сыҡты бит. Береһе башҡортса ла һупалай. Нишләтергә?..

РӘШИТ СОЛТАНГӘРӘЕВ

Сығанаҡ: БР Милли әҙәбиәт музейы (НЛМ РБ)