«Ҡәйнә теле» боролошонда фура водителе һәләк булған

Белорет – Өфө юлындағы халыҡта “Ҡәйнә теле” тип исемләнгән боролошта, билдәле булыуынса, юл-транспорт ваҡиғалары йыш теркәлә.

Бөгөн, 19 июндә, Башҡортостандың «Ҡәйнә теле» боролошонда фура осҡан. Башҡортостан ЮХХДИ-да ошо мәғлүмәтте раҫланылар.

Киске сәғәт етелә Өфө - Инйәр - Белорет юлының 118-се саҡрымында  юл фажиғәһе теркәлгән. 64 йәшлек водитель идара итеү һәләтен юғалтып, трассанан төшөп киткән.  “Scania” йөк машинаһы ауған.  ЮХХДИ-да хәбәр итеүҙәренсә, водитель алған йәрәхәттәренән һәләк булған.

- Ваҡиға урынында ЮХХДИ хеҙмәткәрҙәре һәм башҡа ашығыс хеҙмәттәр эшләй. Тикшереү бара, уларҙың шарттары асыҡлана, - тип аныҡлыҡ индерҙеләр ведомствола.

Юлдарҙа һаҡ булайыҡ. “Ҡәйнә теле”ндә генә түгел, республикалағы башҡа юл участкаларында ла хәүеф юҡ түгел. Был хаҡта һис оноторға ярамай.

Фото: https://ufa1.ru/text/transport/2022/06/19/71422022/