Бөгөн - Халыҡ-ара кеҫә телефонынн баш тартыу көнө

Иғтибар иткәнегеҙ бармы, уҡыуға йә эшкә киткәндә кеҫә телефонын өйҙә онотһағыҙ, был һеҙҙең күбегеҙҙе аяҡтан йығырҙай күңел төшөнкөлөгөнә дусар итә. Көнө буйы үҙегеҙҙе ҡайҙа ҡуйырға белмәй, тынғыһыҙланып сығаһығыҙ, бик мөһим нәмәнән мәхрүм ителгәндәй тояһығыҙ. Ул ғына түгел, телефонығыҙ янығыҙҙа булһа ла, ҡырҡ тапҡыр уны ҡулға алып, экранына ҡарайһығыҙ, шылтыратҡандармы-юҡмы тип тикшерәһегеҙ. Ә инде ул интернетҡа ла тоташһа, виртуаль киңлеккә инеп китеп, сәғәттәр, хатта көн йә төн үткәнен һиҙмәйһегеҙ. Төнөн йоҡларға ятҡанда ла ниңәлер телефонды янығыҙға, хатта яҫтыҡ, матрас аҫтына һалаһығыҙ. Таңға тиклем ул һеҙгә бөтөнләй кәрәкмәйәсәк бит. Шулай булғас, ниңә уны үҙегеҙгә бәйләргә? Сөнки ҡулланмаһағыҙ ҙа, телефон эргәгеҙҙә, ҡул һуҙымында ғына булмаһа, һеҙгә тыныс түгел.

Фото: photoby.ru