Әлшәй районында һыу таҙартыу системаһы эшләй башлаясаҡ

Раевка ауылында «Торлаҡ һәм ҡала мөхите» милли проектының «Таҙа һыу» федераль проекты сиктәрендә Башҡортостанда эшләй башлаған 10-сы эсәр һыу менән тәьмин итеү объектын төҙөү тамамлана. Был хаҡта республика Торлаҡ-коммуналь хужалыҡ министрлығының матбуғат хеҙмәте хәбәр итә.

Әлшәй районындағы проект һыу алыу скважиналарында насос ҡорамалдарын алмаштырыуҙы, тәүлек әйләнәһенә 8 мең кубометр етештереүсәнлеккә эйә булған һыу таҙартыу станцияһын һәм насос станцияһын, 100-шәр кубометр күләмдәге ике таҙа һыу резервуарын, шулай уҡ яңы һыу үткәргес һәм канализация селтәрен төҙөүҙе күҙ уңында тотто.

- Әле объект 94 процентҡа тормошҡа ашырылған, бактерицид ҡулайлама модулен һәм насар аныҡлыҡтағы системаларҙы монтажлау тамамлана. Объект сафҡа индерелгәндән һуң Раевка ауыл советы ауыл биләмәһенең 13 288 кешеһе сифатлы эсәр һыу менән тәьмин ителәсәк. Системаны быйыл көҙ сафҡа индерергә ниәтләйбеҙ, - тип аңлатма бирҙе Рәсәй Төҙөлөш министрлығының Проект дирекцияһы директоры урынбаҫары Татьяна Волкова.

Бөгөн үҙәкләштерелгән һыу менән тәьмин итеү системаларынан сифатлы эсәр һыу менән тәьмин ителгән Башҡортостан халҡының өлөшө 88,9 процент тәшкил итә, ҡала халҡының - 98,3 процент. Торлаҡ-коммуналь хужалыҡ министрлығы мәғлүмәттәре буйынса, 2023 йылда, Раевканыҡынан тыш, тағы 7 объект файҙаланыуға тапшырыла. Бөрөлә һыу таҙартыу системалары, Бүребай, Мораҡ һәм Сергеевка ауылдарының һыу менән тәьмин итеү системалары, Өфөлә Башҡортостан сәскәләре ҡасабаһында, Яңы Нуғай ауылында һыу үткәргестәр, Туймазынан Райман ауылына тиклем һыу үткәргес төҙөлә.

#нацпроекты #национальныепроекты #регпроекты #региональныепроекты #нацпроектыБашкортостана