Айнур Асҡаровтың «Буран» фильмында төп ролде Александр Головин башҡара

Александр Головин: «Мин Өфөнө яратам, һуңғы тапҡыр бында 2015 йылда булғайным, ҡала танымаҫлыҡ булып үҙгәргән. Башҡорт фильмдарына килгәндә, «Һеңлекәш» кинокартинаһы бик оҡшаны...»

Айнур Асҡаровтың «Буран» фильмында Рәсәй актерҙары: «Кадетство», «Папины дочки» сериалдары, «Сволочи», «Ёлки» фильмдары йондоҙо Александр Головин һәм «Илья Муромец» фильмында, «Всё могло быть иначе» сериалында төшкән Ангелина Поплавская ҡатнаша. Александр Головин хоккейсы ролен уйнай.

Кисә Александр Головин Өфөлә IV «Көмөш Аҡбуҙат» халыҡ-ара кинофестивале барышында тамашасылар менән ижади осрашыу үткәрҙе. Ҡаланың «Арт-Квадрат» үҙәгенә актерҙың бик күп табыныусылары йыйылды, унда алма төшөрлөк тә урын юҡ ине. Александр рәхәтләнеп фотоға төштө, автографтар таратты. Йәш актер үҙе, ролдәре һәм «Буран» фильмы өҫтөндә эш хаҡында һөйләне.

«Айнур менән эшләүҙән ҙур ҡәнәғәтлек алам. Яңыраҡ ул миңә ролик күрһәтте, миңә картина бик оҡшаны. Яңыраҡ ҡына эпик матчтарҙы төшөрҙөк. Айнурҙың ярҙамы менән был эште башҡарып сыҡтыҡ, барыһы ла аңлашыла. Тиҙҙән тәрән хисле драма әҙер булыр тип ышанам», — тине Александр.

«Буран» фильмы — экстремаль хәл-шарттарҙа иҫән ҡалыу тураһында драма. Сюжет 2016 йылдың ҡышында режиссерҙың тыуған яғы Хәйбулла районында булған реаль хәл-ваҡиғаларға нигеҙләнгән. Проектты «Башҡортостан» һәм «Асҡарфильм» киностудиялары булышлығында Свердловск киностудияһы төшөрә. Сценарий авторы — Айҙар Аҡманов, режиссер «Өфөнән һөйөү менән» һәм «Өс таған» фильмдарында ла уның менән бергә эшләгәйне. Фильмдың премьераһы 2020 йылға билдәләнгән.