Бөтә яңылыҡтар
Новости
22 Март 2020, 15:45

Ундай гәзит тә бармы?

Ул гәзитте ҡайҙан табырмын икән?

Гүзәл заттарҙың баш ҡала­ла үтәсәк мәртәбәле йыйынына әҙерлек ҡыҙыу барҙы. Бындай ҙа сараға иң лайыҡлы делегаттар һайланды.
Билдәләнгән көн дә етте. Байрам барышын барлыҡ республикаға, халыҡҡа етке­реү бурысы хәбәрселәргә йөк­мәтелгән. Улары инде күптән ярты мәҙәниәт һарайы булып йөрөй. Берәүҙәре фотоға тө­шөрә, телевидение, радио­ныҡылар, нимә тураһында һөйләйем һуң, тип аптыра­ғандарға, мин һөйләгәнде әйтегеҙ, тип артынан ҡабат­лата.
Бына сара башланды. Бер түрә, залдағыларҙы тәбрикләп, ярты сәғәт самаһы иң яҡшы төбәктәрҙең береһендә йәшә­үебеҙ хаҡында һөйләне, гүзәл заттарға ишле балалар үҫте­реү өсөн уңайлы көнкүреш шарттары тыуҙырылыуын иҫкә төшөрҙө. Был тиклем матур сығыштан һуң гөрләтеп ҡул саптылар. Көслө алҡыштарға хатта гәлсәр люстралар ҙа ҡушылып сыңланы. Унан һуң һүҙ делегаттарға бирелде. Кемдер ишле бала тәрбиә­ләүҙән ҡурҡмаҫҡа саҡырҙы, берәү бөгөнгө демографик хәлде яҡшыртыу ниәтенән күп ҡатынлылыҡ хаҡында закон ҡабул итергә кәрәк тине, өсөнсөләр иһә көслө заттарҙы яҡларға кәрәклеген әйтте.
Гөлсөм исемле ханымдың халыҡты, ғаиләне тәрбиәләүҙә матбуғаттың әһәмиәте хаҡын­дағы сығышын залдағылар ифрат оҡшатты. “Йәш быуынды тәрбиәләүҙә гәзит-журналдарҙың ярҙамы баһа­лап бөткөһөҙ ҙур. Бөтәбеҙ ҙә үҙ телебеҙҙә сыҡҡан баҫма­ларға әүҙем яҙылайыҡ”, – тип телмәрен тамамлағас, бе­рәүҙәр, уны хуплауын белдереп, әсе итеп һыҙғырҙы, икенселәр усы ҡыҙғансы ҡул сапты.
Республика гәзите хәбәр­сеһе Нургизә тәнәфес иғлан ителеү менән әлеге делегат янына ашыҡты. Үҙен күреп һөйләшеү мотлаҡ. Фекере елле бит!
– Һаумыһығыҙ! Беҙ республика гәзитенән булабыҙ, үҙегеҙ хаҡында һөйләгеҙ әле, – тине ул.
– Ниндәй гәзиттән тип әйттегеҙ? – Делегат ҡабатлап һораны.
– “Яңы тормош” гәзитенән, – тине хәбәрсе диктофонын рәтләй-рәтләй. – Яңыраҡ ҡына баҫмабыҙҙың йөҙ йыллыҡ юбилейын билдәләнек.
– Ундай гәзит тә бармы ни?
Делегаттың былай һора­уына хәбәрсенең күҙе маң­лайына менһә лә, ғәжәп­ләнеүен һиҙҙермәҫкә тырышты.
– Бар.
– Ҡайҙа сыға?
– Өфөлә.
— Атаҡ! Улай икән, мин тәүге тапҡыр ишетәмсе. – Делегат ханым, яңы планета асҡандай ғәжәпләнеп, ихлас йылмайҙы. – Беҙгә район гәзите генә килә шул. Уныһын да уҡып ултырырға ваҡыт юҡ әле.
Ул арала фотохәбәрсе лә тып итеп килеп баҫты. Уның:
– Миңә иғтибар итмәгеҙ, ана шулай һөйләшеп тороғоҙ, ана шулай, динамика кәрәк, – тип аппаратын шарт та шорт баҫа башлауға ханым риза­һыҙлыҡ белдерҙе:
– Нисек инде улай тота килеп фотоға төшөрәһегеҙ? Әҙерәк биҙәнеп-төҙәнеп алайым. – Бергә эшләгән хеҙмәт­тәштәрем күрһә, шартларҙай булһындар әйҙә. Былай ҙа ошонда китәм тигәс, йәмрәйеп йөрөнөләр. Һөйләргә бер нәмә булыр. – Унан делегат сум­каһын ҡутара башланы, кәрәкле генә әйберен таба алмай хитланды. Бер аҙҙан помадаһын килтереп сығарҙы ла ирененә ҡыҙыл йүгертте. Бына хәҙер була! – Гөлсөм ханым ихлас йылмайҙы.
– Нисегерәк торайым? – Ул фотохәбәрсегә ҡарап йыл­майҙы.
– Хәбәрсе менән һөйләшеп торған булығыҙ. Динамика булһын.
– Ошолай килешерме?
– Ана шулай, ана шулай.
Әңгәмәләшеп бөткәс, ханым мәҡәләнең ҡасан сығыуы менән ҡыҙыҡһынды.
– Ошо йомала.
– Нисәнсе биттә?
– Беренсе биттә буласаҡ.
– Беренсе биттә? Ҡай­һылай шәп! – Делегат ҡәнәғәт йылмайҙы.
– Ул гәзитте ҡайҙан табайым? Беҙҙең ҡалала бармы икән? Бер ҙә генә күҙгә таш­ланғаны юҡ
– Ниңә булмаһын ти?! Тотош республика буйлап тарала. Үҙегеҙ алдырмаһағыҙ, киосктар­ҙа мотлаҡ булырға тейеш.
Унан депутат фотохәбәр­сегә боролдо:
– Һеҙ матурыраҡ фотоны бирергә тырышығыҙ инде. Йылмайып торғанын.
Нургизә рәхмәт әйтеп, һау­буллашып, ишектән сығырға торғанда, делегат ҡулы менән “туҡтап тор әле” тип ишаралап, халыҡты йырмаслай-йырмаслай йүгерә-атлай уның янына килә ине.
— Туғаным, туғаным, саҡ ҡына көтөп торһаңсы. Ней, ҡана телефон һандарыңды бир әле. Кәрәк булыр ул. – Делегат уның телефонын яҙып алды.
***
Нургизә мәҡәләһен өлгөр­тәйем тип ашығып яҙып ултырғанда телефоны шылтыраны.
– Туғаным, туғаным, был Гөлсөм апайың ине. Ней, мин фотомды белешәйем тигәй­нем. Нисек сыҡҡан? Матурмы? Әтеү мин фотола йәмһеҙ сығам да ҡуям.
– Матур булған, апай, бик матур.
– Туғанҡайым, зинһар, иң матурын бирегеҙ инде. Әҙәм көлөрлөк булмаһын.
– Ярай, ярай.
– Беренсе биткә тип әйттегеҙме әлеүел?
– Эйе, эйе.
– Быныһы бигерәк һәйбәт.
– Тик бына ул гәзитте нисек табырмын икән? Ғүмерҙә күргәнем юҡ.
– Ҡалағыҙға бара ул.
Төн уртаһында телефон шылтырағанға Нургизә терт­ләп уянды. Тиккә түгелдер. Ул ҡабаланып телефон төймә­һенә баҫты. Сымдың теге осонда делегат апай ине.
– Туғанҡайым, борсоғанға ғәфү ит инде. Йөрәк түҙмәй. Мин баяғы мәҡәлә хаҡында белешәйем тигәйнем. Сыҡ­тымы шул гәзит, юҡмы?
– Сыҡты, әлбиттә.
– Фотом нисек? Күҙем йомолмағанмы? Йәмрәйеп тормайыммы?
– Һәйбәт сыҡҡан, апай, бик һәйбәт.
– Ниндәйерәк фотоны ҡуйҙығыҙ?
– Йылмайып торғанын.
–Ул гәзитте ҡайҙан табайым икән?
– Киосктарҙа бар ул.
Иртәгәһенә Нургизәнең телефоны тағы шылтыраны. Йәнә теге делегат ине.
– Туғаным, бына әле киоск­тар буйлап йөрөп ятам. Һеҙ ниндәй гәзит тип әйттегеҙ әле ул? Һис кенә лә иҫемә төшөрә алмайымсы...
Читайте нас в