Юлиәне һаман алып ҡайта алмайҙар

Өфө ҡыҙы Юлиә Хәбибуллинаның 15 майҙа Дубайҙа 10 метр бейеклектәге ҡаянан осоп төшөп һәләк булыуы хаҡында хәбәр иткәйнек инде. Ҡыҙҙың кәүҙәһен әле һаман Ғәрәп Әмирлектәренән сығара алмайҙар. Был хаҡта социаль селтәрҙә уның туғандары һәм яҡындары хәбәр итә.

«22 майға Дубайҙан Рәсәйгә рейс бар. Ләкин консуллыҡтан документтарҙың әҙер булмауы сәбәпле, самолетҡа өлгөрөп булмай. Ә улар быны эшләй алмай, сөнки Дубай хоҡуҡ һаҡлау органдарының коронавирусҡа тест һөҙөмтәләрен алмайынса эште ябырға хоҡуғы юҡ», — ти ҡыҙҙың әхирәте Әлфиә Куманаева. Киләһе рейстың ҡасан булыры билдәһеҙ. Юлиәне туғандары яндырырға теләмәй, мосолман ҡанундары буйынса мәйет ерҙә ятырға тейеш. Мәрхүмәне яҡындары Дубайҙа ерләү тураһында ла уйлаша.