Бөгөн Ғәлимов Сәләмдең тыуған көнө

Сәләм Ғәлим улы Ғәлимов (Ғ. Сәләм) 1911 йылдың 18 ғинуарында хәҙерге Силәбе өлкәһе Ҡоншаҡ районы Тәгеш ауылында мулла ғаиләһендә тыуған. 1921 йылды атаһы үлеп, Сәләм ике туғаны менән әсәһе ҡулында тәрбиәләнә. 1924 йылда беренсе баҫҡыс мәктәпте тамамлай, ошо йылдарҙа комсомол сафына инә. 1924 — 1928 йылдарҙа Арғаяшта икенсе баҫҡыс мәктәптә уҡый. Был мәктәпте тамамлағас, ике йыл уҡытыусы булып эшләй. Был йылдарҙа ул үҙе уҡытҡан Ибраһим һәм Ғәлекәй ауылдарында комсомол ячейкаһы секретары вазифаһын алып бара, колхоздар ойоштороу эшендә яҡындан ҡатнаша, “Башҡортостан”, “Башҡортостан йәштәре” гәзиттәренә хәбәрҙәр яҙа.

Ғ. Сәләм 1930 йылда “Башҡортостан” гәзитенә эшкә саҡырыла. Өфөгә күскәс, уның әҙәби ижад һәм журналистик эшмәкәрлеге активлашып китә. Редакцияла ике йыл әҙәби хеҙмәткәр булып эшләгәндән һуң, Ғ. Сәләм Башҡортостан дәүләт педагогия институтына уҡырға инә. 1937 йылда ул институтты беренсе дәрәжә диплом менән тамамлай һәм Башҡортостан тел һәм әҙәбиәт ғилми-тикшеренеү институтына эшкә ҡалдырыла. Ул башҡорт халыҡ ижадын йыйыу, баҫтырып сығарыу һәм фәнни өйрәнеү эштәре менән шөғөлләнә. 1938 йылдың көҙөндә Ғ. Сәләм СССР Фәндәр академияһының Ленинград ҡалаһындағы филиалына фольклор буйынса аспирантураға уҡырға ебәрелә. Ләкин оҙаҡ уҡый алмай: 1939 йылдың 19 июнендә ҡаты ауырыуҙан һуң үлә һәм Ленинградта ерләнә.