Башҡортостанда ял көндәрендә ҡар, ҡар ҡатыш ямғыр, буран, юлдарҙа боҙлауыҡ көтөлә

23, 24 ғинуарҙа республикала төндә ҡар яуасаҡ, томан төшәсәк.Ҡайһы бер райондарҙа буран буласаҡ. Көньяҡ-көнсығыштан, көньяҡтан уртаса тиҙлектә ел иҫәсәк. Төндә -14..-19, аяҙайғанда -22..-27, көндөҙ -7..-12, көньяҡ-көнбайыш райондарында -1..-6 градус һалҡын буласаҡ. Юлдарҙа боҙлауыҡ күҙаллана.

Республиканың Ғәҙәттән тыш хәлдәр министрлығы водителдәрҙе иҫкәртә:

Автомобилдең ҡышҡы тәгәрмәстәрен ваҡытында алмаштырығыҙ;

Юлға сығыр алдынан быяла таҙарта торған ҡулайламаны ҡарҙан таҙартырға иренмәгеҙ. Хәрәкәт иткәндә ҡар йәбешһә, туҡтап, тәҙрәне һәм көҙгөнө таҙартып алығыҙ;

Хәрәкәттең тиҙлеге юлдағы хәл-торошҡа ҡарап билдәләнергә тейеш;

Алда колея күрһәгеҙ, уны машинаның тәгәрмәстәре араһында ҡалырлыҡ итеп үтергә тырышығыҙ. Колеянан барғанда рулде тура тотоғоҙ, тиҙлекте кәметегеҙ;

Ҡырҡа хәрәкәт яһамағыҙ. Ныҡ итеп газға, тормозға баҫырға йәки рулде борғоларға ярамай.

Беҙ һеҙгә алыҫ юлға сыҡмаҫҡа һәм өйҙә ҡалырға кәңәш итәбеҙ!