Үҫеште тиҙләтеү мөһим

Башҡортостанстат мәғлүмәттәре буйынса, 2019 йылда республикабыҙҙың төп капиталына инвестиция күләме 337,7 миллиард һум тәшкил иткән, үҫеш темпы – 119 процент. Был хаҡта, 2020 йылда инвестиция пландарын тормошҡа ашырыу буйынса төбәктең эре предприятиелары менән эшлекле һөйләшеүҙә, Башҡортостан Хөкүмәте Премьер-министры Андрей Назаров хәбәр итте.

– Инвестиция әүҙемлеге дөйөм Рәсәй буйынса кәмегәндә республикала ыңғай динамика күҙәтелә, – тине Андрей Назаров. – Башҡортостан Башлығы тарафынан иҡтисадта коронавирустан һуң күрһәткестәрҙе тергеҙеү бурысы ҡуйылды. Киләсәктә бурыс – иҡтисади күтәрелеште һәм инвестиция үҫешен тәьмин итеү буйынса өлгәшелгән динамиканы һәм билдәләнгән маҡсаттарҙы иҫәпкә алып, уны һаҡлау ғына түгел, ә әлеге үҫеш темпын тиҙләтеү.

Андрей Назаров билдәләүенсә, иҡтисадты күтәреү йәһәтенән күрелгән саралар түбән тәгәрәүгә юлды ябып ҡына ҡалманы, ә төп иҡтисад секторындағы ыңғай үҫеш динамикаһын да тәьмин итте.

– Беҙгә ҙур предприятиелар хужаларының һәм етәкселәренең, республика ойошмаларының позицияһы бик тә мөһим, – тип өҫтәне Андрей Назаров. – Был яҡшы һөҙөмтә генә күрһәтеү мөмкинлеген бирмәй, ә федераль үҙәк менән бәйләнеште нығытыуға һәм өҫтәмә ярҙам алыуға ла булышлыҡ итә.