Ленара Иванова бөгөндән вице-премьер түгел

Бөгөн Хөкүмәттә үткән оператив кәңәшмә мөһим кадрҙар үҙгәреше менән башланды. Улар менән Башҡортостан Башлығы Радий Хәбиров таныштырҙы.

Шулай итеп, һаулыҡ һаҡлау министры Максим Забелин бөгөндән алып Хөкүмәт Премьер-министры урынбаҫары – һаулыҡ һаҡлау министры итеп тәғәйенләнде. Ул һаулыҡ һаҡлауҙан тыш демография, халыҡты медицина ярҙамы менән тәьмин итеү, ғаилә, хеҙмәт, мәшғүллек, халыҡты социаль яҡлау мәсьәләләре менән дә шөғөлләнәсәк. Был вазифала эшләгән вице-премьер Ленара Иванова иһә Премьер-министр урынбаҫары булыуҙан туҡтай һәм Ғаилә, хеҙмәт һәм халыҡты социаль яҡлау министры булып ҡына ҡала. Радий Хәбиров был үҙгәреште аңлатып шуны әйтте:

– Быйыл Башҡортостанда Сәләмәтлек һәм әүҙем оҙон ғүмерлелек йылы тип иғлан ителде. Бында күп нәмә һаулыҡ һаҡлауға бәйле. Иң мөһиме - үлем осраҡтарын кәметеү. Шуға күрә Максим Забелин был эш менән системалы шөғөлләнһен өсөн ошондай ҡарар ҡабул ителде, – тине.