Һәр эштең ауырлығы бар

Хөсәйен Әхмәтов исемендәге Башҡорт дәүләт филармонияһы солисы Искәндәр Ғәзизов:

– Минең уйымса, артист булыу еңелдән түгел...

– Һәр эштең ауырлығы бар инде. Әлбиттә, аҙналар буйы гастролдәрҙә булыу уйын эш түгел, юл йөрөү ҙә арыта. Төрлө ерҙә төрлөсә ҡабул итәләр, әммә тамашасыма үпкәм юҡ, ҡайҙа ғына йөрөһәк тә – Татарстан, Ырымбур, Һамар, Һарытау, Силәбе, Пермь һәм башҡа төбәктәрҙә мине өйҙәренә алып ҡайталар. Шуға ла ҡунаҡханаларҙа бик һирәк ҡунырға тура килә.

Бер ҡыҙыҡ хәлде һөйләп үтәйем әле. Һарытау өлкәһендә гастролдә булғанда үҙебеҙҙең башҡорт­тарыбыҙ Гөләндәм, Зифа апайҙар алып ҡайтты. Уларҙың фермер хужалыҡтары бар. Беҙ, артистар, йоҡлап ятабыҙ. Гөләндәм апай иртәнсәк:

“Балыҡ тоттом, балыҡ күрҙем,

Әйҙә, балалар, тороғоҙ”, –

тип шиғыр һөйләп беҙҙе уятыуы иҫтә ҡалған. Бына ошо осраҡ та беҙҙең улар өсөн көтөп алған ҡунаҡ булыуыбыҙҙы күрһәтә.

– Гәзит уҡыусыларыбыҙҙы шәхси тормошоғоҙ ҙа ҡыҙыҡ­һындыра...

– Тормош иптәшем Элина Фәнүс ҡыҙы – һөнәре буйынса социолог, Башҡортостан Һаулыҡ һаҡлау министрлығында эшләй. Бәләкәй ҡыҙ үҫтерәбеҙ. Мин ҡайтҡанда улар йоҡлай, мин йоҡлағанда – улар сығып китә. Ҡыҙыма гастролдән тәмле күстәнәстәр алып ҡайтам. Бәләкәй булһа ла, гастролдә йөрөгәнде аңлай. Ҡатыным мине аңларға тырыша, артисҡа тормошҡа сыҡҡанын белде бит.