+18 °С
Болотло
Бөтә яңылыҡтар
Новости
8 Март 2021, 14:00
Ят сәскәләр. Нурзилә Усманова.
Ҡәҙерле гүзәл заттар, бөгөн һәр беребеҙгә күңелебеҙ көткән икенсе яртыбыҙҙан ғына гөлләмә алырға насип булһын!
Был сәскәләр һинән түгел ине,
Шуғалыр ҙа улар ят миңә.
Һаны, хаҡы ла бит мөһим түгел,
Әле ул бар, әле ул шиңә.
Был сәскәләр һинең бүләк түгел,
Ҡәҙере юҡ миңә шуға ла,
Хәтеремдә, йәйен һин килгәйнең,
Гөлләмәр тотоп ҡулыңа.
Ваҡыт үтә, ә сәскәләр шиңә,
Оҙаҡ түгел сәскә ғүмере.
Ҡурҡам әле, ят ҡалала һинһеҙ
Һулып ҡуйһам сәскә шикелле.
***
Һиңә
Эй, ҡәҙерлем, хәлдәремдән килһә,
Юйыр инем йыраҡ араны.
Мин арыным бөтмәҫ көтөүҙәрҙән,
Сикһеҙ һағыныуҙан арыным.
Мөхәббәттең көсө етмәнеме,
Беҙҙе еңде алыҫ саҡрымдар.
Хәтирәләр. Яҡты иҫтәлектәр
Һәр кис һайын ала алҡымдан.
Икебеҙҙе айыра ике ҡала,
Сит кешеләр йөрөй янымда.
Бик бәхетле кеүек тойолалар,
Һине көн дә күрә алғандар.
Әгәр яҙмыш шулай ҡушҡан икән,
Күпме көтөргә лә әҙермен.
Тик ебәрәм, башҡа саралар юҡ,
Һин бәхетле генә бул, ҡәҙерлем.
***
Яңғыҙҙар быуаты - егерме бер,
Үҙ самаһын үткән был тойғо.
Күмәк-күмәк яңғыҙ кеше атлай,
һәр кем үҙе, ләкин бер ҡайғы.
Бәйләп торған күпме саралар бар,
Яҙ, шылтырат, һөйлә хәбәрең.
Саҡрымдарҙы тиҙ арала үтеп,
Һәр кем тапһын ине үҙ йәрен,
24!
Һеҙ барығыҙ, ә мин ҡалам,
Ҡуҙғалмайым урынымдан!
Бында күгем зәңгәр-зәңгәр,
Уйым яҡты, аҙым йылдам.
Светофорҙа йәшел янған,
Атлар юлым иркен-иркен.
Нимә эшләр, ҡайҙа барыр,
Ҡасан ҡайтыу - минең иркем.
Көҙгөлә миңә йылмайған,
Был ҡыҙ бигерәк бәхетле.
Донъям минең түп-түңәрәк,
Йыһанымдың һис юҡ сите.
Эх, ошолай ҡалһын ине,
Йәшлегемдә илһам һәм дәрт.
Мин бала, ола ла түгел,
Миңә бары егерме дүрт.
***
Ысынбарлыҡ,
Шаяртма һин.
Һындырам тип, яндырам, тип.
Киреләнһәң, бер үҙеңде,
Яңғыҙлыҡта ҡалдырам тип.
Ысынбарлыҡ,
Мин килешмәм,
Һалҡын батҡаҡ йөҙөң менән,
Яҡты, сағыу уйым менән,
Пәрҙәләрҙе йыртып асып,
Яҡтылыҡҡа осоп менәм.
Ысынбарлыҡ,
Һиндә, әллә саф хистәргә, ер ҡалмаған.
Мөхәббәт тә, һинең залға,
Билет һатып алалмаған?
***
Үҙгәрергә ине, тигән уйҙар,
Баштан сыҡмай һуңғы арала.
Эй, Хоҙайым, барлыҡ шик-яттарҙан,
Кескәй йөрәгемде арала.
Арала һин, мине, бер ҡатлыны,
Ышаныуҙан юҡ-бар хәбәргә.
Көс бир миңә, ҡаршы торор өсөн,
Нахаҡ бәләләргә, йәбергә.
Үҙгәр! Ләкин балалығым күптән
Ябайлыҡты алған үҙ итеп.
Бары үҙем булып ҡалам әле,
Булмаҫ инде мине үҙгәртеп.
Читайте нас:
© 2024 «Шоңҡар» - Башҡортостан йәштәренәң ижтимағи-сәйәси, әҙәби-нәфис журналы
Баш мөхәррир: Айгиз Ғиззәт улы Баймөхәмәтов
Телефон
(347)272-61-64
Электрон почта
Адресы
450079, Республика Башкортостан, г. Уфа, ул. 50 летия Октября, 13, каб. 910
Ҡабул итеү бүлмәһе
Венер Айҙар улы Исхаҡов (яуаплы сәркәтип) - 89279443170
Хеҙмәттәшлек
Финзира Ғариф ҡыҙы Рысаева - 89174785622