Ике ерҙән ике еңеү

Башҡортостан ҡыҙҙары ла, егеттәре лә һынатмай.

6 ноябрҙә Төркиәлә уҙғарылған «Евразия Королеваһы - 2021» тип аталған Халыҡ-ара матурлыҡ бәйгеһе финалында Альбина Шәйхлисламова Гран-при яулаған. Европаның 28 иленән йыйылған һылыуҡайҙар араһында 22 йәшлек БДМУ студентына етеүсе булмаған. Уңған ҡыҙ ковид-госпиталдә шәфҡәт туташы булып эшләп тә өлгөрә икән.

Икенсе шатлыҡлы яңылыҡ, йәш баянист Илеш районы егете Вадим Төхвәтуллин менән бәйле. Ул ун йәшкә тиклемге “Трофей донъяһы” тип аталған Халыҡ-ара конкурсында абсолют еңеүсе тип табылған.

Вадим да 38 илдән килгән башҡа йәш баянистарҙың танауына сиртеп, республика данын лайыҡлы яҡлаған. Үҫмерҙе был конкурсҡа әсәһе лә, уҡытыусыһы ла Гөлназ Төхвәтуллина әҙерләгән.