Башҡортостанға Раштыуа һыуыҡтары килде. Синоптиктар хәбәр итеүенсә, уҙған төндә республиканың төньяҡ райондарында термометр бағанаһы 40 градусты уҙып киткән. Атап әйткәндә, Башгидрометүҙәктең һауа торошо картаһы мәғлүмәттәре буйынса, 8 ғинуарҙа иртәнге сәғәт 8-ҙә Ҡариҙел районында минус 41 градус теркәлгән. Архангел һәм Иглин райондарында ла иртән шулай уҡ һалҡын булды. Унда термометр бағанаһы -39 градус күрһәткән.
8 ғинуарҙа иртән Өфөлә 32 градус һыуыҡ булды.
БР Гидрометеорология һәм тирә-яҡ мөхиткә мониторинг идаралығынан хәбәр итеүҙәренсә, алдағы көндәрҙә термометр бағанаһының минус 40-42 градусҡа тиклем түбәнәйеүе ихтимал.
Хәйер, киләһе аҙнаның икенсе яртыһында уҡ һыуыҡтар әкренәйә башлаясаҡ, республиканың күпселек райондарында бер аҙ ҡар яуасаҡ.