Рәсәйҙә 1 сентябрҙән техник тикшереү ҡағиҙәләре үҙгәрә

1 сентябрҙән Рәсәйҙә техник тикшереү процедураһына һәм автомәктәптәрҙә уҡытыу программаларына яңы талаптар үҙ көсөнә инде. Хөкүмәт ҡарары рәсми хоҡуҡи мәғлүмәт порталында март башында уҡ баҫылған.

Хөкүмәт ҡарарына ярашлы, техник тикшереү хәҙер транспорт сараһында аптечка, ут һүндергес һәм авариялы туҡталыштың юл билдәһе булыуын контролдә тотоуҙы күҙ уңында тотмай. Шуға ҡарамаҫтан, юл хәрәкәте ҡағиҙәләре элеккесә ошо предметтарҙың машинала булыуын талап итә.

Шулай уҡ транспорттың төп агрегаттарында майҙарҙың һәм эш шыйыҡсаларының ағыуын тикшереү, тауыш кимәлен үлсәү, номерҙарҙы ҡуйыуҙың дөрөҫлөгөн, тормоз системаһы элементтарының коррозияһын һәм тормоз үткәргес торбаларҙың боҙолоуын контролдә тотоу мотлаҡ булмаясаҡ.

Ләкин көсөнә ингән ҡағиҙәләр яңылыҡтарҙы ла күҙ уңында тота: мәҫәлән, двигателде диагностикалау барышында "һауа тултырыуҙы" йәки "сығарыу системаһы" н урап үткән газдарҙың китеүен (сығарыу коллекторын, тауыш кәметкесте) тикшерә башлайҙар.

Быйыл йыл башында шәхси еңел автомобилдәрҙе мотлаҡ техник тикшереү туҡтатылды. Әммә машина хужаһын иҫәпкә ҡуйыу йәки алмаштырыу (әгәр транспорт сараһының йәше дүрт йылдан артһа), шулай уҡ автомобиль конструкцияһына үҙгәрештәр индереү һәм уның төп деталдәрен алмаштырыу элеккесә техник тикшереүҙе талап итә.

Автомәктәптәргә ҡалала В категорияһына хоҡуҡ алған граждандар өсөн практик уҡытыу сәғәттәре һанын арттырырға ҡуштылар. Водителдәр яңыртылған программалар буйынса ҡайтанан әҙерләнәсәк.