Әгәр мобилизацияланған сәләмәт булмаһа

Район хәрби комиссариатында медкомиссияны беҙҙең өсөн үткәрмәнеләр, уны хәрби әҙерлек урынында үтәсәгебеҙ хаҡында әйттеләр. Ә бында медицина тикшереүе генә үткәрелгән. Ни өсөн оҙатыр алдынан мобилизацияланған граждандарға ентекле медицина тикшереүе үткәрелмәй? Һөҙөмтәлә берәйһен ҡаты сир менән өйөнә ҡайтаралар. Урал ХӘМИТОВ. Шишмә районы.

Яуап бирә БР Хәрби комиссариатының Хәрби-табип экспертизаһы үҙәге рәйесе Арыҫланбәк МӨТӘЛИПОВ

- Медицина комиссияһы хәрби хеҙмәткә саҡырылыусылар өсөн ойошторолған формала, мобилизацияланғандар өсөн ҡаралмаған. Уларҙың ҡораллы көстәр сафында хеҙмәт итеүе, медицина комиссияһы үтеүе һәм яраҡлылыҡ категорияһы (А йәки Б) алыуы арҡаһында. Әлбиттә, йылдар үткәс - кемдеңдер 20 йәше лә үтте - кешенең сәләмәтлеге үҙгәрә, кемдеңдер йәрәхәт алыуы мөмкин ине. Запастағы хәрби хеҙмәткәрҙәргә йәшәгән урындары буйынса хәрби комиссариатҡа килергә һәм һаулыҡ торошоноң, шулай уҡ социаль статустың үҙгәреүе тураһында хәбәр итергә кәрәк. Шуға ярашлы, медицина белешмәләре һәм һығымталар нигеҙендә хәрби хеҙмәткә яраҡлылыҡ категорияһы үҙгәртелеүе мөмкин.

Хәрби комиссариаттан повестка алған граждан А йәки Б категорияһына эйә булһа, мобилизацияланырға тейеш. В («сикләп яраҡлы») һәм Г («ваҡытлыса яраҡһыҙ», максималь ваҡыт - алты айға тиклем) категориялары булған граждандарға кисектереү бирелә. Д категорияһы - «яраҡһыҙ» - менән граждан резервсылар исемлегенән һыҙып ташлана. Яраҡлылыҡ категорияларын билдәләүсе бөтә ауырыуҙар РФ Хөкүмәтенең 2013 йылдың 4 июлендәге 565-се «Хәрби-табип экспертизаһы тураһында положениены раҫлау тураһында»ғы ҡарарында килтерелгән. Беҙ уларға таянып эш итәбеҙ.

Өлөшләтә мобилизация сиктәрендә  повестка алған граждандар хәрби комиссариатта медицина тикшереүе үтә. Әгәр хәрби хеҙмәт үтәй алмаҫлыҡ сирҙәр булһа, саҡырылған егет ауыртыуға, хроник сирҙәрҙең киҫкенләшеүенә зарланһа һәм табиптың граждандың "яраҡһыҙ" категорияларға инеүе мөмкин тигән фаразға нигеҙе булһа, ул медицина тикшереүенә ебәрелә. Өҫтәмә тикшеренеүҙәр (МРТ, КТ, УЗИ һәм башҡалар) тик дәүләт медицина ойошмаларында ғына үткәрелә. Ғәҙәттә, тикшереүгә аҙнанан артыҡ бирелмәй. Пациентҡа сир тураһында медицина һығымтаһы бирәләр, иҫәпкә ҡуялар. Артабан район хәрби комиссариатынан табип ҡарарын комиссия республика хәрби комиссариатында раҫларға һәм яраҡлылыҡ категорияһын билдәләргә тейеш. Йәғни, асылда, мобилизацияланған граждандар өсөн медицина комиссияһы заявка характерында.

Башҡортостан Һаулыҡ һаҡлау министрлығының матбуғат хеҙмәтендә хәбәр итеүҙәренсә, хроник сирле мобилизацияланған һалдат хәрби комиссариатҡа амбулатор медицина картаһы, дауалаусы табиптан күсермә алырға мөмкин, сөнки хәрби учреждениела ундай мәғлүмәттәр юҡ.