Өфө халҡын Беренсе Май байрамына саҡыралар

Дүшәмбе, 1 майҙа, Өфөлә яҙ һәм хеҙмәт байрамын билдәләйҙәр. Был көндә өс ҡала паркында һәм «Өфө - хеҙмәт ҡаһарманлығы ҡалаһы» стелаһы алдындағы майҙанда байрам саралары күҙалланған, тип хәбәр иттеләр баш ҡала хакимиәтендә.

Мәҫәлән, иртәнге сәғәт 11-ҙә стела янында сәскә һалыу тантанаһы була, унда ветерандар һәм тыл эшсәндәре, шулай уҡ йәмәғәт ойошмалары, министрлыҡтар һәм ведомстволар вәкилдәре ҡатнаша.

«Беренсе май» мәҙәниәт һәм ял паркында көндөҙгө сәғәт 12-лә «Өфө - дуҫлыҡ һәм берҙәмлек ҡалаһы» милли мәҙәниәттәр фестивале башлана. Бында ижади конкурстар, күргәҙмәләр һәм йәрминкәләр үтәсәк.

Яҡутов исемендәге паркта көндөҙгө сәғәт 1-ҙә бейеү марафоны, «Чародеи» театр-студияһының эстрада артистары һәм иллюзиясыларының сығышы, шулай уҡ уйындар һәм бүләктәр менән конкурстар планлаштырылған.

18:00 сәғәттә «Кашҡаҙан» мәҙәниәт һәм ял паркында балалар оркестрҙары һәм инструменталь ансамблдәр фестивале башланасаҡ.